बेंसीशहर वस दुर्घटनामा घाइते युवतीको उपचारको क्रममा मृत्यु
काठमाडौ । बेसीशहर नगरपालिका ८ शेरामा बिहीबार बस दुर्घटनामा परी गम्भीर घाइते युवतीको उपचारको क्रममा शुक्रबार दिउँसो मृत्यु भएको छ ।
बेसीशहरबाट डुम्रेतर्फ जानको लागि तयारी अवस्थामा रहेको ना५ख ४०८१ नम्वरको वस ओरालोबाट गुडेर भीरतर्फ खस्दा राइनास नगरपालिका ९, कुवापानी घर भइ हाल भोटेओडार बस्दै आएकी २२ वर्षीय मिष्मा गुरुङ गम्भीर घाइते भएकी थिइन् ।
लमजुङ अस्पतालमा उपचार हुन नसकी बिहीबार नै चितवन मेडिकल कलेज भरतपुर पु¥याइएका उनको उपचारको क्रममा मृत्यु भएको प्रहरीले जनाएको छ । जिल्ला प्रहरी कार्यालय लमजुङका सूचना अधिकारी प्रहरी निरीक्षक जगदिश रेग्मीले ती युवतीको आइसीयुमा उपचार गराइरहेको अवस्थामा पछिल्लो समय भेन्टिलेटरमा राखेर उपचार गराइरहेको थियो । उनको उपचारको क्रममा शुक्रबार दिउँसो २ बजेतिर मृत्यु भएको खबर प्राप्त भएको उहाँले बताउनुभयो ।
बेंसीशहरको शेरा फिल्महल चोकको बस टिकट काउन्टर नजिकै ओरालोमा रोकेर राखेको बस एक्कासी गुडेर दुर्घटना हुँदा बिहीबार ६ जना घाइते भएका थिए । अन्य ५ जनाको अवस्था सामान्य रहेकोमा सवै लमजुङ अस्पतालमा उपचार गरी बिहीबार नै घर फर्केका छन् ।
प्रहरीका अनुसार बिहीबार दिउँसो साँढे २ बजेतिर बस दुर्घटना भएको थियो । उक्त बसमा १२ जना यात्रु रहेको र गुडेर खसेपछि पाखुरीको रुखले रोकेको कारण बढी क्षति हुन नपाएको प्रहरीले जनाएको छ । प्रहरीले बस चालक खोटाङ घर भई हाल तनहुँको भानु नगरपालिका ९ बाइसजाँगर बस्ने ३० वर्षीय हेमन्त तामाङलाई पक्राउ गरी सवारी ज्यान मुद्दामा अनुसन्धान अघि बढाएको जनाएको छ ।
