बालेनको उर्दी बेवास्ता गरेपछि भत्किँदै राप्रपाको केन्द्रीय कार्यालय
काठमाडौं,१५ साउन । राष्ट्रिय प्रजातन्त्र पार्टीको केन्द्रीय कार्यालय रहेको धुम्बराहीस्थित कार्यालयमा काठमाडौं महानगरपालिकाले आजै डोजर चलाउने भएको छ ।
गत शुक्रबार महानगरले आजसम्म केन्द्रीय कार्यालय रहेको भवन खाली गराउन उर्दी जारी गरेकोमा राप्रपाले बेवास्ता गरेपछि महानगरले डोजर चलाउन लागेको हो ।
महानगरले बिजुलीको हाइस्टेशन मुनी भवन रहेको भन्दै राप्रपालाई आजसम्म खाली गर्न अल्टिमेटम दिएको थियो ।
महानगरले डोजर ल्याउन लागेको सूचनासँगै राप्रपा कार्यकर्ताहरु केन्द्रीय कार्यालयमा भीड लागेका छन् । डोजरलाई अवरोध गर्ने तयारीसहित सवारीसाधनहरु तेर्स्याइएको छ ।
महानगरले नगर प्रहरी प्रमुख राजु पाण्डेको नेतृत्वमा ३०० जनाभन्दा धेरै नगर प्रहरी उक्त क्षेत्रमा खटाएको बताइएको छ ।
कल्याण राजभण्डारी र प्रज्ञा चापागाईँको नाममा रहेको उक्त घर राप्रपाले २०६९ सालदेखि प्रयोग गर्दै आएको छ ।
दाताहरुले राप्रपालाई यो घर-जग्गा प्रयोग गर्न दिएता पनि नक्शापास नहुनाले राप्रपाको नाममा भने आएको छैन् ।
