तीन महिनामै बन्यो झोलुङ्गे पुल, छोटियो एक घण्टाको बाटो
कास्की । कास्की जिल्लाको माछापुच्छ«े गाउँपालिका—१ को अन्तिम गाउँ हो साँदल र कपुचे । सेती नदीको मुहान क्षेत्रका यी दुई गाउँ भौगोलिक रुपमा समेत विकट छन् ।
साँदल र कपुचेलाई विकट बनाएको छ सेती नदीले । हिउँदमा नदीमाथि बनाइएको बाँस र काठका फड्केबाट नदी वारपार गरेपनि वर्खामा भने स्थानीयवासीले नदी तर्न सास्ती बेर्होनुपर्दछ ।
पुल नहुँदा नदी वारपारका लागि घुमाउरो र अप्ठ्यारो बाटो हिँड्नुपर्दछ, एक घण्टाको समय लाग्छ । अहिले भने झोलुङ्गे पुल बनेसँगै स्थानीयको जीवनचर्यामा सहज बनेको छ । पुल बनेसँगै एक घण्टाको बाटो पाँच मिनेटमै वारपार गर्न सकिन्छ । स्थानीयवासी समेत उत्साहित बनेका छन् ।
कपुजे र साँदल जोड्ने गरी सेती नदीमाथि ७९ मिटर लामो झोलुङ्गे पुल बनाइएको हो । यस पुलको निर्माण कार्य तीन महिनामै सम्पन्न भएको छ । पुलको विसं २०७९ चैत २० गतेदेखी काम सुरु भएकामा असार २६ गते निर्माण सकिएर सञ्चालनमा आएको हो ।
माछापुच्छ«े—१ का सरोजकुमार गुरुङले झोलुङ्गे पुल निर्माणले साँदलका नागरिक प्रत्यक्ष लाभान्वित भएको बताउनुभयो । उहाँका अनुसार विकट गाउँमा पुलबनेसँगै सुगममा परिणत भएको छ ।
उहाँले भन्नुभयो,“हिउँदयाममा अस्थायी व्यवस्था भएपनि वर्खामा यहाँका नागरिकले सेती वारपार गर्न ठूलो सास्ती र झन्झट थियो, समय पनि धेरै लाग्ने । अहिले झोलुङ्गे पुल बनेसँगै विकट गाउँ सुगम बनेको छ । स्थानीयको मुहारमा खुशी छाएको छ ।”
पुल निर्माणका लागि माछापुच्छ«े गाउँपालिकाले रु १७ लाख ७२ हजार ९९, टिविएसयू पोखराबाट रु १२ लाख १७ हजार बराबरका स्टिल पार्टस्,झोलुङ्गे पुल क्षेत्रगत कार्यक्रमबाट रु तीन लाख २० हजार १६९ र स्थानीय उपभोक्ताबाट जनश्रमदान रु एक लाख ८१ हजार ३६३ गरी कुल रु ३४ लाख ९१ हजार लागत रहेको माछापुच्छ«े—१ का वडाध्यक्ष इन्द्रबहादुर गुरुङले जानकारी दिनुभयो ।
गाउँपालिका अध्यक्ष मीनबहादुर गुरुङले पुलको उद्घाटन गर्नुभयो । सो अवसरमा उहाँले गाउँपालिकाका विकट गाउँहरुमा झोलुङ्गे पुल निर्माणलाई प्राथमिकतामा राखिएको बताउनुभयो ।
उहाँले आवश्यकताका आधारमा पालिकाका अन्य वडाहरुमा समेत लागत साझेदारीमा पुल निर्माण गर्ने योजना रहेको बताउनुभयो ।-हिमाली आवाज
