हनी ट्रयापमा पारेर बार्गेनिङ गर्ने युवती र पत्रकार बनेर मोलमोलाइ गर्ने युवकसहित चार जना पक्राउ
काठमाडौं । हनी ट्रयापमा पारेर बार्गेनिङ गरेको आरोपमा ललितपुर प्रहरीले युवतीसहित ४ जनालाई पक्राउ गरेको छ ।
पक्राउ पर्नेमा झापाको विर्तामोड स्थायी घर भई बानेश्वर बस्दै आएकी २४ वर्षीया अनिता तामाङ, सिन्धुपाल्चोकको बलेफीका दीपक पराजुली, सोही ठाउँका २७ वर्षीय विमल सुवेदी र सुनकोशीका सरोज तिमल्सिना रहेका छन् ।
प्रहरीका अनुसार पराजुली गाडी चालक तथा सुवेदी र तिमल्सिना पठाओ चालक हुन् । अनिताले विवाहित युवकहरुसँग डेटिङ गरेर पछि पैसाको बार्गेनिङ गर्ने गरेको प्रहरीको दाबी छ ।
सामाजिक सञ्जालमार्फत सम्पर्कमा ल्याएर उनले फन्दामा पार्ने गरेको प्रहरीले जनाएको छ । प्रहरीले तीन लाख रुपैयाँको चेक लिएको अवस्थामा उनीहरुलाई पक्राउ गरेको हो ।
पीडितले उजुरी गरेपछि प्रहरीले गोप्य अनुसन्धान गरिरहेको थियो । पराजुलीले आफूलाई पत्रकार बताएर पीडितसँग पैसाको मोलमोलाइ गर्ने गरेको प्रहरीको दाबी छ ।-नेपाल प्रेस
