वर्षाको गतिविधि बढ्यो, अब तीन दिन यस्तो हुनेछ देशभरको मौसम
काठमाडौं । नेपालमा वर्षा गराउने गतिविधि बढेको छ । अबका तीन दिन वर्षाको सम्भावना हिजोआजका तुलनामा बढी रहेको मौसम पूर्वानुमान महाशाखाले जनाएको छ ।
आज रातिदेखि वर्षाको सम्भावना बढ्नेछ । तीन दिनसम्म सामान्यदेखि पूर्ण बदली रहने महाशाखाका मौसमविद् प्रतिभा मानन्धरले बताइन् ।
“देशैभर सामान्यदेखि पूर्ण बदली रहनेछ । यो भनेको बादल लागिरहने हो,” उनले बाह्रखरीसित भनिन्, “बादल लागिरहने र पानी पर्ने हुन्छ । केही स्थानमा भारी वर्षाको समेत सम्भावना छ ।”
उनका अनुसार यो अवधिमा काठमाडौं उपत्यकासहित देशका धेरै स्थानमा हल्कादेखि मध्यम वर्षा हुनेछ । केही स्थानमा भारी वर्षा समेत हुने सम्भावना छ ।
हाल नेपालमा मनसुनी वायुको साथै भारतको बिहार र पूर्वी उत्तर प्रदेश आसपासको आकाशमा अवस्थित न्यूनचापीय प्रणालीको प्रभाव रहेको महाशाखाले जनाएको छ ।
मनसुनको न्यूनचापीय रेखा अहिले ‘अलिकति माथि सरेको’ मौसमविद् मानन्धरले बताइन् । सोही कारण वर्षाको गतिविधि बढेको उनले जानकारी दिइन् ।
“न्यूनचापीय प्रणाली अलिकति माथि सरेको छ । त्यसले वर्षाको गतिविधि बढेको हो । आज रातिदेखि तीन दिनसम्म वर्षाको सम्भावना अहिलेभन्दा बढी देखिन्छ,” उनले भनिन् ।
यो रेखा जता नजिक भयो, त्यता वर्षाको गतिविधि बढी हुने उनले बताइन् । उनका अनुसार केही दिनपछि यो रेखा नेपालनजिक सर्न सक्ने सम्भावना छ । त्यसो भएको खण्डमा यहाँ वर्षाको सम्भावना अझ बढी हुनेछ ।
“यो अहिलेसम्मको स्थिति हेर्दा हो । भोलि फेरि पूर्वानुमान गर्छौँ । अहिलेको अवस्थामा तीन दिन बदलीको सम्भावना बढी छ,” उनले भनिन् ।
आज राति कोसी, वाग्मती, गण्डकी, लुम्बिनी र सुदूरपश्चिम प्रदेशका केही स्थानहरूमा, कर्णाली प्रदेशका थोरै स्थानहरूमा र मधेस प्रदेशको एक/दुई स्थानमा हल्कादेखि मध्यम वर्षाको सम्भावना रहेको महाशाखाले जनाएको छ । वाग्मती, लुम्बिनी र सुदूरपश्चिम प्रदेशका एक/दुई स्थानमा मेघगर्जन/चट्याङसहित भारी वर्षाको समेत सम्भावना रहेको महाशाखाले जनाएको छ ।
भोलि दिउँसो कोसी, वाग्मती, गण्डकी, लुम्बिनी, कर्णाली र सुदूरपश्चिम प्रदेशका केही र मधेस प्रदेशका थोरै स्थानहरूमा हल्कादेखि मध्यम वर्षाको सम्भावना छ । कोसी, वाग्मती, गण्डकी, लुम्बिनी र सुदूरपश्चिम प्रदेशका एक/दुई स्थानमा मेघगर्जन/चट्याङसहित भारी वर्षाको समेत सम्भावना छ ।
भोलि राति कोसी, मधेस, वाग्मती र गण्डकी प्रदेशका केही र बाँकी प्रदेशका थोरै स्थानहरूमा हल्कादेखि मध्यम वर्षाको सम्भावना छ । कोसी, मधेस, वाग्मती, गण्डकी र लुम्बिनी प्रदेशका एक/दुई स्थानमा मेघगर्जन/चट्याङसहित भारी वर्षाको समेत सम्भावना छ । कोसी प्रदेशको तराई भू–भाग र मधेस प्रदेशका थोरै स्थानहरूमा हावाहुरीको पनि सम्भावना रहेको महाशाखाले जनाएको छ ।
