‘ओभर ड्रिंक’ गरेर अन्धधुन्ध टिपर हाँकेपछि…
काठमाडौं । सुनसरीमा मादकपदार्थ सेवन गरेर टिपर चलाएको र दुर्घटना गराएको आरोपमा एकजना पक्राउ परेका छन् । पक्राउ पर्नेमा इनरुवा नगरपालिका–८ का रेवत मण्डल छन् ।
शनिबार राति उनले हाँकेको प्र–१०२–००१–ख ८३०७ नम्बरको टिपर इनरुवा–४ मा दुर्घटना भएको थियो । मण्डलले ‘ओभर ड्रिंक’ गरेर टिपर चलाएको पाइएको जिल्ला प्रहरी कार्यालय सुनसरीका एसपी प्रभु ढकालले
बताए ।
उनका अनुसार उक्त टिपर सडक किनारका चार/पाँच विद्युतीय पोलमा ठोक्किएको थियो । टिपर अनियन्त्रित रूपमा अघि बढेको थियो । त्यसपछि नजिकै खोल्सामा खसेको उनले बताए ।
“ओभर ड्रिंक (अत्यधिक मदिरा सेवन) गरेर टिपर चलाएको रहेछ, पोलमा ठोक्किँदै खोल्सामा गएर खसेको थियो । त्यसपछि २००–३०० पब्लिकले घेरेर राख्नुभएको थियो,” उनले बाह्रखरीसित भने, “हामीले उनलाई समातेर ल्याएका हौँ । थप अनुसन्धान भइरहेको छ ।”
मण्डलको उमेर कति हो भन्ने पुष्टि हुन बाँकी रहेको उनको भनाइ छ ।
टिपरका मालिकलाई प्रहरी कार्यालयमा बोलाइएको र थप अनुसन्धान गरिरहेको उनले जानकारी दिए ।
