सर्वोच्च अदालतका न्यायाधीशका पिएसओको पेस्तोल यसरी चोरीएको रहेछ
काठमाडौँ । सर्वोच्च अदालतका न्यायाधीश नहकुल सुवेदीका निजी सुरक्षा अधिकृत (पिएसओ)ले बोक्ने पेस्तोल चोरी भयो । असार ३१ मा राति पेस्तोल चोरी भएकोबारे प्रहरी नायव निरीक्षक प्रभाकर खड्काले प्रहरी वृत बौद्धमा जानकारी गराएका थिए ।
बौद्धस्थित खड्काको घरको पहिलो तलाबाट दुई जनाले पेस्तोल सहितको झोला चोरेको अनुसन्धानबाट थाहा भएको छ । चोरले ‘अङ्कुसे’ ले तानेर झोला बाहिर निकालेको र त्यहाँबाट पेस्तोल निकाले अनुसन्धानमा संलग्न एकजना अधिकृतले रातोपाटीलाई बताए ।
चोरीमा संलग्न आरोपमा सिन्धुपाल्चोक घर भएका २४ वर्षीय वासुदेव थामी र सिन्धुली घर भएका मेघबहादुर तामाङलाई पक्राउ गरिएको जिल्ला प्रहरी परिसर काठमाडौँका एसपी कुमोध ढुङ्गेलले रातोपाटीलाई बताए ।
चोरले मध्यराति मकैबारीमा लगेर झोला खानतलासी गरेका थिए । प्रहरी नायव निरीक्षक (सई) प्रभाकार खड्काको झोला र प्रहरी परिचयपत्र मकैबारीमा भेटिएको छ । पेस्तोल र ७ राउन्ड गोली बोकेर चोर अर्को घरमा चोर्न गएका थिए । नजिकैको अर्को घरबाट उनीहरूले आइफोन ‘सेभेन प्लस’ चोरेर हिँडेको अनुसन्धानबाट थाहा भएको छ ।
आइफोन अनलक गरेपछि…
न्यायाधीशका पिएसओको पेस्तोल चोरेको घटना पत्ता लगाउन प्रहरीलाई १९ दिन लाग्यो । शुरुमा ‘क्लू’ नै नभेट्दा समय लागेको अनुसन्धानमा संलग्न अधिकृतहरू बताउँछन् । पेस्तोल चोरेपछि मेघबहादुर तामाङले बौद्ध शिवमन्दिरस्थित आफ्नो डेरामा लुकाएर राखेका थिए ।
पेस्तोल लुकाएर उनीहरू आइफोन बेच्न लागिपरे । प्रहरीलाई झुक्क्याउन उनीहरू चोरेको आइफोन ‘सेभेन प्लस’ को लक खोल्न ललितपुरस्थित सातदोबाटो पुगे । सातदोवाटोमा पूर्व परिचित मोबाइल पसलेकहाँ गएर मोबाइल अनलक गर्न लगाए ।
अनुसन्धान अधिकृतहरू मोबाइल अनलक गर्ने पसल सञ्चालक कहाँ पुगेपछि चोरीमा संलग्नहरूको पहिचान खुलेको अनुसन्धानमा संलग्न अधिकृतहरू बताउँछन् । आरोपितहरूलाई चोरी मुद्दामा म्याद लिएर अनुसन्धान भइरहेको एसपी ढुङ्गेलले जानकारी दिए ।
अरोपीहरुले लुकाएर राखेको चाइनिज ‘टाइप–५४’ पेस्तोल प्रहरीले बरामद गरेको छ । सो पेस्तोल प्रहरीले भिआइपीको सुरक्षामा प्रयोग गर्दै आएको छ । -रातोपाटी
