सात जिल्ला जोड्ने भीमदत्त राजमार्ग भासियो,सडक अवरुद्ध, यात्रु अलपत्र
कैलाली । सुदूरपश्चिम प्रदेशको पहाडी सात जिल्ला जोड्ने भीमदत्त राजमार्ग भासिएको छ ।
गोदावरी नगरपालिका ४ स्थित सडकमा पहिरो खसेपछि भासिएको जिल्ला प्रहरी कार्यालय कैलालीले जानकारी दिएको छ ।
हिजो राति करिब ११ बजे उक्त सडकमा पहिलो खसेको थियो । त्यसपछि अवरुद्ध भएको सडक अझै सुचारु हुन सकेको छैन ।
अहिले पनि पहिरो खस्ने क्रम जारी रहेको हुँदा सडक खुलाउन समस्या भइरहेको जिल्ला प्रहरी कार्यालय कैलालीका प्रवक्ता प्रहरी नायव उपरीक्षक कुलदीप चन्दले जानकारी दिए ।
पहाडी सात जिल्लाबाट आएका गाडी अहिले धनगढी आउन सकेका छैनन् । धनगढीबाट पहाडी सात जिल्लाका लागि छुटेका गाडी पनि त्यही रोकिएका छन् ।
हिजो राति देखी सयौँ यात्रुहरू अलपत्र परेका छन् । पहिरोका कारण सडक समेत भासिएको छ ।
