आफ्नै लिङ्ग काटेर घाइते भएका युवकको शल्यक्रिया सकियो, काटिएको भाग जीवित नहरेकाले फाल्नु पर्यो
काठमाडौँ । आफ्नै लिङ्ग काटेर घाइते भएका युवकको चितवन मेडिकल कलेज भरतपुरमा शल्यक्रिया गरिएको छ । लिङ्ग काटेपछि घाइते भएका मकवानपुरको मकवानपुरगढी गाउँपालिका-७ नयाँगाउँका २२ वर्षीयको शल्यक्रिया गरिएको हो ।
ती युवकले साउन ३१ मा राति मकवानपुरको हेटौँडा उपमहानगरपालिका-१० स्थित फुलवारी होटल एण्ड लजमा आफ्नै लिङ्ग काटेका थिए । उनको लिङ्गको चुँडिन लागेको भागलाई फालेर शल्यक्रिया गरिएको कलेजका निर्देशक डा. दयाराम लम्सालले जानकारी दिए । ६/७ घण्टा भन्दा पहिले काटिएको र काटिएको भाग जीवित नभएको त्यसलाई हटाइएको छ । उनी अहिले खतरामुक्त अवस्थामा छन् ।
लिङ्ग काटेपछि घाइते भएका उनी आफैँ उपचारका लागि हेटौँडा अस्पताल पुगेका थिए । अस्पतालले थप उपचारको लागि राति नै चितवन मेडिकल कलेज रेफर गरेको थियो । ओभरसियर पढेका उनी ‘साधु’ बन्छु भनेर हिँडेका थिए । यद्यपि उनले प्रहरीसँग ‘होटलमा बिच्छीले टोकेको र विष सर्न नदिन लिङ्ग काटेको’ बयान दिएको मकवानपुरका एसपी सिताराम रिजालले बताए ।
