तिनकुने हत्याकाण्ड : घटनालगत्तै ट्याक्सी चढेर आफैं प्रहरी चौकी पुगेका थिए दीपेन्द्र
काठमाडौ। काठमाडौंको तीनकुनेस्थित गैह्रीगाउँमा गएराति चार जनाको विभत्स हत्या भएको छ । हत्या हुनेमा एकै परिवारका तीन जना छन् । दोलखा घर भएका ५५ वर्षीय कुमार भुजेलको परिवारका तीन जनाको हत्या भएको हो । एक जना भने मोरङका हुन् ।
हत्या गरिएका भुजेल सोही काठ मिलमा सुरक्षा गार्डकारूपमा कार्यरत थिए । मिलभित्रै उनकी श्रीमती करिब ५० वर्षकी अम्बिका भुजेल र आमा ७६ वर्षिया सुमित्रा भुजेलको पनि हत्या भएको छ ।
त्यस्तै अर्का मृतक भने मोरङ बेलवारी स्थायी घर भएका करिब २० वर्षीय युवक नवीन राई हुन् । उनीहरूको शरीरका विभिन्न ठाउँमा धारिलो हतियार प्रहार भएको गहिरो चोट छ ।
हत्या घटनामा संलग्न भएको आशङ्कामा प्रहरीले २८ वर्षे दीपेन्द्र राईलाई नियन्त्रणमा लिएको छ । उनी तीनकुने नै बस्दै आएका व्यक्ति हुन् । प्रहरीका अनुसार, रक्सीले मातेका राई कपडामा रगत लतपतिएको अवस्थामा आँफै प्रहरी चौकीमा पुगेका थिए । घटनालगत्तै घटनास्थलबाट हडबडाउँदै सडकमा निस्किएका राईले ट्याक्सी भेटेपछि तीनकुनेको प्रहरी चौकीमा पुर्याइदिन भनेका थिए र प्रहरी वृत्त नयाँबानेश्वर पुगेको प्रहरीले जनाएको छ ।
प्रहरीले राईलाई पुर्याउने ट्याक्सी चालकसँग पनि सोधपुछ गरेको छ । प्रारम्भिक अनुसन्धानका क्रममा राईका बुवा दिव्य सःमिलमै लामो समय काम गरेर छोडेका थिए । बुवाले काम गर्ने भएकोले पहिलेदेखि नै नवीन त्यहाँ आउनेजाने गर्थे । राईका बुबा अहिले धनकुटामा छन् । हत्या भएका नवीन राई उनका साथीसमेत हुन् ।
हत्या भएका कुमार भने उक्त मिलमा २५ वर्षदेखि काम गर्दै आएका थिए । श्रीमतीसँग बस्दै आएका कुमारकी आमा भने केही दिनअघि मात्रै काठमाडौं आएकी थिइन् । ७६ वर्षिया सुमित्रा कुशे औशीको अवसरमा श्राद्धका लागि काठमाडौं आएकी थिइन् । गैरीगाउँबाट सिनामंगलतर्फ जाने सडक किनारामै जोडिएको दिव्य स–मिल दोलखाको कालिञ्चोक गाउँपालिका घर भई गौशाला बस्ने बालकृष्ण शिवाकोटीको हो ।
घटनाको काठमाडौँ उपत्यका प्रहरी कार्यालय, काठमाडौँ उपत्यका अपराध अनुसन्धान कार्यालय र जिल्ला प्रहरी परिसर काठमाडौँको टोलीले घटनाको अनुसन्धान शुरू गरेको छ ।
