प्रमुख प्रशासकीय अधिकृतमाथि आक्रमण, हाम फालेर जोगिए
धनगढी । दार्चुलामा एक प्रमुख प्रशासकीय अधिकृतमाथि आक्रमण भएको छ ।
जिल्लाको मार्मा गाउँपालिकाका प्रमुख प्रशासकीय अधिकृत रोशन अधिकारीमाथि आक्रमण भएको हो।
उनी सुतिरहेको बेला अज्ञात समूहले आक्रमण गरेको हो । जिल्ला प्रहरी कार्यालय दार्चुलाका अनुसार अधिकारी सुतिरहेको अवस्थामा शुक्रबार राति अज्ञात समूहले ढुंगामुढा र आगजनी गरेको छ ।
प्रमुख प्रशासकीय अधिकृत अधिकारी सुतिरहेको सरकारी आवासमा राति करिब १ः४५ बजेको समयमा ढुंगा प्रहार गरेको र आगो लगाएको जिल्ला प्रहरी कार्यालय दार्चुलाका सूचना अधिकारी गोविन्द भण्डारीले बताए ।
प्रमुख प्रशासकीय अधिकृत सुतिरहेको अवस्थामा झ्यालबाट ढुंगामुढा भएर आगजनी गरेको विवरण आएको उनले बताए । प्रमुख प्रशासकीय अधिकृतको आवास र इलाका प्रहरी कार्यालय आसपासमा हुँदा पनि कसले त्यस्तो गरेको हो भन्ने खुलेको छैन ।
प्रमुख प्रशासकीय अधिकृत अधिकारी झ्यालबाट हाम फालेर प्रहरीकोमा पुगेका थिए । त्यसपछि प्रहरीले आगो नियन्त्रणमा लिएको थियो। घटनामा को संलग्न छन् भन्ने खुलिसकेको छैन। जिल्ला प्रहरी कार्यालयका सूचना अधिकारी भण्डारीले घटनाको कारण यकिन भइनसकेको बताए ।
घटनाको अनुसन्धानका लागि जिल्ला प्रहरी कार्यालयबाट पनि प्रहरी टोली मार्मा पुगेको छ । प्रमुख प्रशासकीय अधिकृत अधिकारीले मार्मा गाउँपालिकामा सञ्चालमा रहेका अवैध क्रसर रोक्न र सार्वजनिक स्थानमा मदिरा बिक्री रोक्न सूचना जारी गरेका थिए । मार्मा गाउँपालिकामा राजश्व नतिरी सञ्चालनमा रहेका दुईवटा क्रसरलाई राजश्वको दायराभित्र आउन पत्र काट्दा पनि नमानेपछि बन्द गर्न सूचना जारी गरिएको थियो ।
त्यस्तै, सार्वजनिक स्थानमा मदिरा बिक्रीवितरण रोक्न पनि सूचना जारी भएकै राति प्रमुख प्रशासकीय अधिकृतमाथि आक्रमण भएको हो । मार्मा गाउँपालिकाका अध्यक्ष जमनसिंह धामी काठमाडौंमा रहेको बेला यस्तो घटना भएको हो । तर घटनामा संलग्नहरुको खोजी र आवश्यक अनुसन्धान गर्ने काम भइरहेको जिल्ला प्रहरी कार्यालय दार्चुलाले जनाएको छ ।-प्रेस पत्र
