पाँचथरको एक घरमा विस्फोट: एकैघरका २ बालबालिकाको मृत्यु
पांचथर । पाँचथरको फालेलुङ गाउँपालिका–५ मा बिहीबार साँझ भएको विस्फोटमा परी दुई जना बालबालिकाको मृत्यु भएको छ ।
मृत्यु हुनेमा दीलिप साँवाका ११ वर्षका छोरा डिक्सन साँवा र २ वर्षकी छोरी प्रिन्सा साँवा छन्। २ जना घाइते भएका छन्। घाइतेमध्ये एकजनाको जिल्ला अस्पतालमा उपचार भइरहेको अर्को एक जनाको स्थानीय अस्पतालमा उपचारपछि जिल्ला अस्पताल पठाइएको छ ।
डाडागाउँ भन्ने स्थानमा आइतराज केरुङको घरमा विष्फोट भएको थियो। सुरक्षा निकायले यसलाई ‘होममेड ग्रिनेट’ को विस्फोट भएको अनुमान गरेको छ ।
माओवादीको द्वन्दकालमा यो घर सेल्टरको रुपमा प्रयोग भएकोले त्यति बेलाकै ग्रिनेड हुनसक्ने प्रहरीले अनुमान गरेको छ ।
