इटहरीमा लेनदेन विवादमा कुटपिट, एक जनाको हत्या
इटहरी । इटहरी उपमहानगरपालिका–१६, उब्दीमा सामान्य लेनदेनको विवाद ज्यान लिने घटनामा परिणत भएको छ।
बुधबार राति करिब ९ः३० बजे स्थानीय ४२ वर्षीय रामकुमार चौधरीको कुटपिटका कारण मृत्यु भएको हो।प्रहरीका अनुसार सोही स्थानका करिब ५०–५५ वर्षीय लाल चौधरीले लेनदेनको विषयमा वादविवाद गर्ने क्रममा रामकुमारलाई कुटपिट गरेका थिए। कुटपिटका क्रममा टाउकोमा गम्भीर चोट लागेपछि उनको अवस्था गम्भीर बनेको थियो।
घाइते चौधरीलाई परिवारले तत्कालै इटहरीस्थित सान्वी सिटी अस्पताल पुर्याए। तर, सामान्य उपचारपछि थप उपचारका लागि उनलाई विराटनगरस्थित विराट टिचिङ अस्पताल लगिएको थियो।
सोही अस्पतालमा उपचारकै क्रममा राति ११ः२० बजेतिर उनको मृत्यु भएको अस्पताल स्रोतले जनाएको छ।घटनाको जानकारी पाएलगत्तै इलाका प्रहरी कार्यालय पकलीबाट प्रहरी निरीक्षक लेखनाथ दाहाको कमाण्डमा टोली खटिएको थियो।घटनामा संलग्न लाल चौधरीलाई नियन्त्रणमा जिल्ला प्रहरी कार्यालय सुनसरीको हिरासतमा राखिएको प्रहरीले जनाएको छ।
हाल मृतकको शव अस्पतालमै राखिएको छ। घटनाबारे थप अनुसन्धान भइरहेको जिल्ला प्रहरी कार्यालय सुनसरीले जनाएको छ।
