सुनसरीमा भन्सार छलीका ४ लाखभन्दा बढीका कपडा बरामद, मोटरसाइकल सहित एक जना पक्राउ
सुनसरी । सुनसरीमा भन्सार छली गरी भारतबाट नेपालतर्फ ल्याउँदै गरिएको रु. ४ लाखभन्दा बढी मूल्यका लत्ताकपडासहित एक जना पक्राउ परेका छन्।
जिल्ला प्रहरी कार्यालय सुनसरीका अनुसार मंगलबार बिहान ८:३० बजे देवानगञ्ज गाउँपालिका–६ हकपाडास्थित भित्री सडकखण्डमा भारतबाट नेपालतर्फ आउँदै गरेको बीआर ३८ एच–०४–८६२ नम्बरको मोटरसाइकललाई प्रहरीले जाँच गरेको थियो।
सो क्रममा भन्सार छली गरी अवैध रूपमा ल्याइँदै गरेका अन्दाजी रु. ४ लाख १० हजार ४ सय मूल्य बराबरका लत्ताकपडा बरामद गरिएको प्रहरीले जनाएको छ।
प्रहरीले मोटरसाइकल चालक देवानगञ्ज गाउँपालिका–६ निवासी ३० वर्षीय मोहमद सज्जादलाई नियन्त्रणमा लिएको छ।
पक्राउ परेका व्यक्ति, बरामद लत्ताकपडा र मोटरसाइकललाई आवश्यक कारबाहीका लागि जिल्ला प्रहरी कार्यालय सुनसरीमा राखिएको प्रहरीले जनाएको छ।
जिल्ला प्रहरी कार्यालय सुनसरीका सूचना अधिकारी प्रहरी नायव उपरीक्षक चन्द्रबहादुर खड्काले उक्त जानकारी दिएका हुन्।
