धनकुटा पुगेर फर्किंदै थिए रोहित…
विराटनगर । इटहरी धरान सडक खण्डको सेउती पुलमा गोली हानेर हत्या गरिएका विराटनगरका रोहित चौधरी धनकुटा घुमेर फर्किएको खुलेको छ ।
उनी विराटनगरकै सुमना खत्रीसँग धनकुटा घुमेर मोटरसाइकलमा घर फर्कँदै थिए ।
धनकुटा घुमेर फर्किदा उनीहरू धरान इटहरी सडक खण्डको सेउती पुल कटेर रोकिएका थिए । सडक किनारामा मोटरसाइकल रोकेर बसेका बेला पैदल हिँड्दै आइरहेका ३ जना युवाले उनीहरूलाई लुटपाटको प्रयास गरेका थिए ।
घटना हुँदा सँगै रहेकी सुमनाले विवादपछि त्यो समूहमध्येका एक जनाले नजिकैबाट गोली प्रहार गरेको प्रहरीलाई बताएकी छन् ।
गोली प्रहारबाट रोहित गम्भीर घाइते भएका थिए । सुमनाले नै एम्बुलेन्स रोकेर घाइते रोहितलाई बिपी प्रतिष्ठानमा उपचारको लागि पुर्याएकी थिइन् ।
सुमनाका अनुसार हतियारधारी समूहका २ जनाले खुकुरी बोकेका थिए भने एक जनासँग पेस्तोल थियो । घटनास्थल धरान र इटहरीको सीमा क्षेत्र हो ।
अहिले चार कोशे जंगल क्षेत्रमा इटहरी र धरान प्रहरीले जङ्गलमा सर्च अप्रेसन गरिरहेको जिल्ला प्रहरी कार्यालय सुनसरीका प्रवक्ता राजकुमार राईले बताए ।
उनले सीमा नाकामा पनि कडाइका साथ चेकजाँच भइरहेको छ । घटनास्थल चार कोशे जङ्गल भएकोले पनि प्रहरीले जङ्गलमा सर्च अभियान गरिरहेको छ ।
सुमनालाई चोटपटक नलागे पनि मानसिकरुपमा उनी विक्षिप्त बनेकी छन् ।-नेपाल प्रेस
