संखुवासभा कैदी मृत्यु प्रकरण : कारागारका दुई कर्मचारी नियन्त्रणमा
संखुवासभा । संखुवासभाको कारागारभित्र दुई कैदीको मृत्यु प्रकरणमा प्रहरीले त्यहाँका दुई कर्मचारीलाई नियन्त्रणमा लिएको छ ।
कैदीको हत्या प्रकरणमा मुछिएका कारागारका कम्प्युटर अपरेटर इन्द्रनारायण यादव र कार्यालय सहयोगी ढकलाल कार्कीलाई नियन्त्रणमा लिइएको जिल्ला प्रहरी कार्यालय संखुवासभाका प्रहरी नायब उपरीक्षक वीरेन्द्र गोदारले जानकारी दिए । पक्राउ परेका कम्प्युटर अपरेटर यादव र कार्यालय सहयोगी कार्कीविरुद्ध शुक्रबार म्याद थप गरेर अनुसन्धान भइरहेको प्रहरी नायब उपरीक्षक गोदारले बताए ।
कुटपिटमा प्रत्यक्ष संलग्न देखिएका प्रहरी, चौकीदार र कैदीविरुद्ध कर्तव्य ज्यानमा मुद्दा दर्ता गरिएको छ । कैदी हत्या प्रकरणमा प्रत्यक्ष संलग्न देखिएका झन्डै डेढ दर्जन व्यक्ति प्रहरी हिरासतमा छन् ।
कारागारमा रहेको सीसीटीभी फुटेज अध्ययनबाट घटनामा प्रहरी, चौकीदार र कारागार कर्मचारीसहित केही कैदीको संलग्नता देखिएको थियो । कैदी हत्या प्रकरणमा प्रत्यक्ष संलग्न देखिएका केही प्रहरीविरुद्ध विभागीय कारबाही हुने प्रहरीले जनाएको छ ।
कुटपिटबाट गएको साउन २४ गते संखुवासभाको मादी नगरपालिका–५ का २० वर्षीय विनोद तोलांगी र नुवाकोटको ककनी गाउँपालिका–७ का २८ वर्षीय आकाश बलामीको मृत्यु भएको थियो । २५ जनाको क्षमता रहेको कारागारमा अहिले १३६ कैदीबन्दी छन् । रासस
