विराटनगरमा जीआइएस हाउस नम्बरिङ सुरु
विराटनगर । आरयुडीपी प्रोजेक्टअन्तर्गत विराटनगर महानगरपालिकाले वैज्ञानिक ठेगाना प्रणाली (जीआइएस हाउस नम्बरिङ सिस्टम) कार्यान्वयनका लागि घर नम्बर राख्न सुरु गरेको छ ।
महानगरले सहरीकरणसँगै घर संख्या बढ्दो अवस्थामा रहेका कारण मेट्रिक ठेगाना प्रणाली कार्यन्वयनमा ल्याएको हो । यो प्रणालीले नगरवासीको घर पहिचान सहज बनाउनेछ । महानगरकी कार्यबाहक मेयर शिल्पा निराला कार्कीले आइतबार जीआइएस हाउस नम्बरिङ सिस्टमको प्रारम्भ गर्नुभयो । नमुनाका रुपमा पहिलो चरणमा ६७ घरमा नम्बरिङ गरिनेछ ।
विराटनगरका आसपासका मुख्य बजार क्षेत्रमा नम्बरिङ गरिने महानगरपालिकाले जनाएको छ । निकट भविष्यमा अन्य स्थानमा पनि नम्बरिङ कार्यान्वयन गराउने कार्यबाहक मेयर कार्कीले बताउनुभयो ।
एडीबीको सहयोगमा सञ्चालन भएको आरयूडिपी परियोजनाअन्तर्गत छुटेको काम अहिले कार्यन्वयनमा आएको महानगरपालिका इन्जिनियर अर्जुन थापाले जानकारी दिनुभयो । यसलाई क्रमशः सबै वडामा विस्तार गर्ने लक्ष्य राखिएको छ ।
यो प्रणालीमा मुख्य त सडकको दूरीलाई आधार बनाउने गरिन्छ । सडक÷गल्लीको नाम र दुरीको आधारमा घर नम्बर प्रदान गरिने भएकाले पहिचानमा सहज हुने भएको हो । घरसँग जोडिएको सडकको सुरुको बिन्दुदेखि घरको मूल ढोकासम्मको दुरी घरको नम्बर प्लेटमा राखिनेछ ।
बाटोको सुरुको बिन्दुबाट मिटरको आधारमा दाँयापट्टी जोर नम्बर बाँया पट्टी बिजोर नम्बर दिइनेछ । कर व्यवस्थापनका लागि महानगरलाई सहज हुनेछ ।
वैज्ञानिक प्रणालीअन्तर्गत घर नम्बर पत्ता लगाउन पनि सहज हुनेछ । सडकको चोक तथा मिलन बिन्दु (दोबाटो–चौबाटो) देखि कुनै निश्चित घरको दूरीका आधारमा ठेगाना पत्ता लगाउन सकिने प्रणालीलाई मेट्रिक प्रणाली भनिन्छ ।
कार्यबाहक मेयर कार्कीले महानगरसँगै जोडिएको विराटनगर–७ का देवकीनन्दन अग्रवालको घरमा पहिलो नम्बर टाँस गरेर यसको शुभारम्भ गर्नुभयो । योसँगै रोडशेषलाई मिनल बिन्दु मानेर मेन रोडका घरहरूमा दूरीका आधारमा घर नम्बर टाँस गरिनेछ । यसमा बाटो–गल्ली–टोल नाम उल्लेख हुनेछ । यसले भविष्यमा स्मार्ट सिटीका रुपमा विकास गर्नसमेत सहयोग पुग्ने कार्यबाहक मेयर कार्कीले जानकारी दिनुभयो ।
त्यसबाहेक कर तथा राजस्व, नागरिकको स्तर बर्गिकरण, विपद् आईपर्दा द्रुत सेवा सञ्चालन, गरिबी पहिचान, पूर्वाधार पहुँच लगायतको विषय जानकारी हुन सजिलो हुनेछ ।
