सहिदभूमिका राई सहित २ जना पक्राउ
बिराटनगर, पुस ५ । सुनसरी र उदयपुर जिल्लाको छुट्टाछुट्टै स्थानबाट प्रतिबन्धीत लागुऔषध ब्राउनसुगर र गाँजा सहित दुई जनालाई प्रहरीले पक्राउ गरेको छ ।
हिजो दिउँसो १ बजे जिल्ला प्रहरी कार्यालय सुनसरीबाट कोशी गाउँपालिका- १ स्थितमा खटिएको प्रहरी टोलीले चेकजाँच गर्ने क्रममा भारतबाट नेपालतर्फ आउदै गरेको सहिदभुमि गाउँपालिका- ४ धनकुटाका ३२ बर्षीय निजम राई र राप्ति नगरपालिका- ९ दाङका बिशाल थापालाई संकास्पद अवस्था फेला पारी चेकजाँच गर्दा उनिहरुको साथबाट ४ ग्राम ब्राउनसुगर फेला पारी प्रहरीले नियन्त्रणमा लिएको हो ।
त्यस्तै उदयपुरको ताप्ली गाउँपालिका- २ लेखगाँउ स्थित १६ किलोग्राम गाँजा बेवारिसे अबस्थामा जिल्ला प्रहरी कार्यालय उदयपुर र प्रहरी चौकी रामपुर झिल्केबाट खटिएको प्रहरी गस्ति टोलीले फेला पारी बरामद गरेको हो ।
बरामद गरेको गाँजा र लागुऔषध सहित पक्राउ परेका उनिहरुको सम्बन्धमा सम्बन्धित प्रहरी कार्यालयहरुबाट थपअनुसन्धान भईरहेको छ ।
