सातै प्रदेशका मुख्यमन्त्री सहभागी हुने अन्तरप्रदेश सम्मेलन विराटनगरमा
विराटनगर, २७ असाेज । कोशी प्रदेश सरकारको आयोजनामा सातै प्रदेशका मुख्यमन्त्रीहरू सहभागी हुने दुईदिने ‘अन्तरप्रदेश मुख्यमन्त्री सम्मेलन–२०८३’ आजदेखि विराटनगरमा सुरु हुँदैछ।
सम्मेलनमा संघीयताको सबलीकरण, अन्तरप्रदेश समन्वय, आर्थिक एकीकरण, प्राकृतिक स्रोतको उपयोग, विपद् व्यवस्थापन र विकास साझेदारीका विषयमा विस्तृत छलफल हुनेछ।
सम्मेलनको पहिलो दिन सातै प्रदेशका उपलब्धि तथा सफल अभ्यासबारे अनुभव आदानप्रदान गर्नुका साथै संघीयता, संस्थागत विकास र अन्तरप्रदेशीय आर्थिक साझेदारीसम्बन्धी कार्यपत्रहरू प्रस्तुत गरिनेछन्। साथै, स्थानीय उद्योगी तथा व्यवसायीहरूसँग उत्पादन र निर्यात प्रवर्द्धनका विषयमा अन्तरक्रियासमेत हुनेछ।
त्यस्तै, सम्मेलनको दोस्रो दिन सातै प्रदेशबीच विकास साझेदारीको साझा प्रतिबद्धतासहित ‘कोशी घोषणा–२०८३’ जारी गर्ने कार्यक्रम रहेको छ। बिहान १० बजे घोषणापत्रमा मुख्यमन्त्रीहरूले हस्ताक्षर गर्ने र दिउँसो पत्रकार सम्मेलनमार्फत भावी कार्यदिशा सार्वजनिक गरिनेछ।
यस सम्मेलनबाट अन्तरप्रदेश समन्वय र सहकार्यलाई थप प्रभावकारी बनाउँदै साझा विकासका योजनाहरू अघي बढाउन मद्दत पुग्ने अपेक्षा गरिएको छ।
