आगलागीबाट २२ घर जलेर नष्ट, आगलागीको कारण खुल्न सकेन
वीरगन्ज, १३ वैशाख । वीरगन्ज उपमहानगरपालिका–२१ पटेलनगरमा आज दिउँसो आगलागी हुँदा करिब रु ४५ लाख बराबरको क्षति भएको छ ।
आगलागीबाट २२ वटा घर, अन्नपात, लत्ता कपडा, फर्निचरलगायतका सामग्री जलेर नष्ट भएको प्रहरी नायब उपरीक्षक चक्रराज जोशीले बताउनुभयो ।
करिब तीन घन्टापछि मात्र आगो नियन्त्रणमा लिइएको थियो । वीरगन्ज, कलैया, नेपाल आयल निगम, चन्द्रनिगाहापुरबाट आएको वारुणयन्त्र, स्थानीयबासी र सुरक्षाकर्मीको प्रयासबाट आगो नियन्त्रणमा लिइएको हो ।
यसैबीच, अग्निपीडितलाई दैवी प्रकोप उद्धार समिति तथा नेपाल रेडक्रस सोसाइटी पर्साले चामल, चार हजार थान बाल्टिन, भाँडाकुँडा, त्रिपाल वितरण गरेको छ ।
आगलागीको कारण खुल्न सकेको छैन । रासस
