नेकपा एमालेको ऐतिहासिक सफलता : कम्तीमा ३ महानगरसहित १ सय २० बढी स्थानमा जित्ने निश्चित
काठमाण्डौं, ७ जेठ । प्रमुख प्रतिपक्षी दल नेकपा (एमाले) ले स्थानीय तहको पहिलो चरणको निर्वाचनमा ऐतिहासिक सफलता प्राप्त गरेको छ । अहिलेसम्म ४१ नगरपालिका र ७२ गाउँपालिकासहित ११३ स्थानीय तहमा एमालेले विजय हासिल गरेको छ ।
घोषित मत परिणामअनुसार निर्वाचन भएका ५० जिल्लाका सदरमुकाम तथा प्रमुख शहरी क्षेत्रका नगरपालिकामा विजय हासिल गर्नुका साथै एमालेले विगतको विजयलाई निरन्तरता दिंदै अग्रता कायम गरेको छ ।
मतगणना भइरहेका चार महानगरपालिकामध्ये तीन महानगरपालिका काठमाडौं, भरतपुर र पोखरा–लेखनाथमा एमालेको अग्रता कायमै छ भने ललितपुर महानगरमा पनि नेपाली काँग्रेसका उम्मेदवारसँग एमालेले मतान्तर कम गर्दै अगाडि बढिरहेको कारण पनि एमालेले मुलुकका कम्तीमा तीन महानगरपालिकासहित एक सय २० स्थानमा जित्ने आँकलन गरिएको छ ।
