९ वर्ष देखि डोरीमा १४ बर्षीय बालक ! दयनीय अवस्था, उपचार भन्दा पनि छाक टार्नै समस्या
दमक । झापाको शिवसताक्षी—७ स्थीत सिमलचोकका एक १४ बर्षीय बालकलाई विगत ९ वर्ष अघिदेखि डोरीले बाँधेर राख्ने गरेको पाइएको छ । आर्थिक अवस्था कम्जोर भएकै कारण १४ बर्षीय लक्ष्मि निरौलालाई उपचार अभावमा परिवारले खुट्टामा बाधेर राख्नु बाध्यता बनेकोछ ।
निम्न वर्गीय निरौला परिवारलाई छोराको उपचारभन्दा पनि बिहान बेलुकाको छाक कसरी टार्ने भन्ने चिन्ताले बढी पिरोल्ने गरेको छ । यो परिवारलाई आफ्नो जग्गा जमिन नभएकै कारण ज्याला मजदुरी गरेर बिहान बेलुकीको हातमुख जोड्न समेत हम्मे हम्मे हुने गरेको छ । शारीरिक अपाङ्गता भएका लक्ष्मीप्रसाद निरौला १४ वर्षका भए । उनी लरा्याङ लुरुङ गदै हिंड्न डुल्न सक्छन् तर बोल्न सक्दैनन् । सुष्त मनस्थिती भएका निरौलालाई बाँधेर राख्नु पर्ने परिवारको बाध्यता रहेको छ ।
स्थानीय क्षेत्रमा रहेका बिभिन्न अस्पतालहरुमा लगेर स्वास्थ्य परिक्षण पनि गराएको निरौला परिवारले बताउछन । आमा दुर्गादेवि निरौलाको चौथो सन्तानका रुपमा जन्मिएका लक्ष्मिलाई निरौला परिवारले सामान्य बनाउनकालागि धेरै धामी झाक्रि पनि लगाए । तर आर्थिक अवस्था कमजोर भएकै कारण सुविधा सम्पन्न अस्पतालहरुमा लगेर स्वास्थ्य परिक्षण गराउन नसकेपछि बाँधेर राख्नु्को विकल्प नभएको आमा दुर्गा देबी बताउनहुन्छ ।
निरौला परिवालाई दुई वर्ष अघि साहारा नेपालले तीन कोठाको घर बनाइदिएको छ । त्यही घरमा अहिले उनिहरु जसोतसो जिवन धान्दै आइरहेका छन । निर्वाचनताका विभिन्न पार्टीका नेता तथा कार्यकर्ताहरु भोट माग्न आउँदा छोराको अवस्था देखेर उपचारका लागि सहयोग गर्ने प्रतिवद्धता जनाएका थिए । तर जितेर गएकाहरु पनि अहिले सम्म फर्किएर नआएको बुबा यमप्रसाद निरौलोको गुनासो रहेको छ ।
लक्ष्मी घर बाहिर गए हराउने अनि बांधेर नराखे घरभित्रका सरसामानहरु तोडफोड गर्ने परिवारले जनाएको छ । मानसिक सन्तुलन ठीक नभएको र उपचार पनि गर्न नसकेको अवस्थामा लक्ष्मीलाई संरक्षण गर्न परिवारलाई बाध्नुको विकल्प छैन । – हाम्रो दमक ।
