प्रधानमन्त्री ओलीले सांसदहरुलाई भने,- कर्मचारी सरुवा बढुवाको होइन विकासको फाइल बोक्नुहोस्
काठमाण्डौ १९ फाल्गुन । प्रधानमन्त्री तथा नेकपा एमालेका अध्यक्ष केपी शर्मा ओली र नेकपा माओवादीका अध्यक्ष पुष्पकमल दाहाल प्रचण्डले जनतालाई एक बनाउनका लागि पार्टी एकता हुने बताएका छन ।
शनिबार संघिय संसद भवन नयाबानेश्वरमा आयोजित एमाले र माओवादीबाट निर्वाचित भएका सांसदको एकीकृत बैठकलाई सम्बोधन गर्दै ओली र प्रचण्डले जनताले भरोसा गरे अनुरुपको पार्टी एकता हुने बताए । बैठकमा प्रधानमन्त्री ओलीले नेपालको राजनीति र वाम एकतामा भारतको चासो रहेको र त्यसलाई आफूहरुले सकारात्मक रुपमा लिएको बताए ।
कानुन र सरकार जन्मने ठाउँमा एमाले र माओवादीका सांसद भेला हुनु र एकताको बलियो सन्देश दिनु विकासको आधार बन्ने ओलीको भनाई छ । ओलीले पछिल्लो समय स्वतन्त्र न्यायालयको चाहनामा धक्का लागेको टिप्पणी पनि गरे । यस्तै प्रतिपक्षीलाई पनि सँगै लिएर विकासको बाटोमा देशलाई लैजाने उनले बताए । प्रधानमन्त्री ओलीले सांसदलाई निर्देशन दिँदै सरुवा बढुवाको नभइ विकासको फाइल बोक्न आग्रह गरे ।
बैठकलाई सम्बोधन गर्दे नेकपा माओवादीका अध्यक्ष पुष्पकमल दाहाल प्रचण्डले दुई दलका सांसद एक ठाउँमा भेला हुनु त्यसको प्रमाण रहेको बताए । देशको प्रशासनीक तथा राजनीतिक संरचनामा नयाँपन दिएकाले अब विकासमा पनि नयाँपन दिने प्रचण्डको भनाई छ । उनले एक आपसमा तितो अतीत बोकेका एमाले र माओवादी एक हुनु कल्पना बाहिरको कुरा रहेको तर कल्पना भन्दा बाहिरको कुरा आफूहरुले साकार पारेको बताए ।
एमाले र माओवादी एक अर्काको संरक्षक बन्दै पार्टी एकतासम्म आएको भन्दै दुई पार्टीबिच विगतमा संविधानसभामा आउने सहमति पहिलो भएको र त्यसपछि मात्रै शान्ति सम्झौता भएको प्रचण्डले उल्लेख गरे ।
