सोनिया गान्धीको भिडियो सन्देश प्रधानमन्त्री ओलीबाट रिट्वीट भएपछि
काठमाडौं, ५ पुष । प्रधानमन्त्री केपी शर्मा ओलीको आधिकारिक ट्वीटर ह्याण्डललाई लिएर यतिबेला भारतीय सञ्चारमाध्यमले विभिन्न टिकाटिप्पणी गरेका छन् । भारतमा जारी नागरिक ऐनको विरोधमा भइरहेको प्रदर्शनलाई लिएर प्रधानमन्त्री ओलीको ट्वीटरबाट रिट्वीट भएसँगै भारतीय सञ्चारमाध्यमले प्रश्न उठाएका हुन् ।
भारतीय कांग्रेसकी अध्यक्ष सोनिया गान्धीले नागरिकता विधेयकका सम्बन्धमा सार्वजनिक गरेको एक भिडियो सन्देश नेपालका प्रधानमन्त्री केपी शर्मा ओलीको आधिकारिक ह्याण्डलबाट शुक्रबार साँझ रिट्वीट भएको थियो ।
सोनिया गान्धीले अंग्रेजीमा दिएको भिडियो सन्देशमा भाजपा सरकारले जनताको आवाज सुन्नुपर्ने उल्लेख छ । आफ्नो अधिकारका लागि गरेको संघर्षमा उत्रिएका जनतालाई कांग्रेस पार्टीको साथ रहेको पनि उनले भिडियोमा बताएकी छन् ।
प्रधानमन्त्री केपी शर्मा ओलीका प्रेस सल्लाहकार सूर्य थापाले भने प्रधानमन्त्रीको ट्वीटर ह्याण्डलको पासवर्ड दुरुपयोग भएको आशंकामा छानविन भइरहेको उल्लेख गरेका छन् ।
तर, भारतीय द टेलिग्राफको अनलाइन संस्करणमा कोलकाता डेटलाइनले संशयपूर्ण समाचार बनाएको छ । यस्तै, भुटानी मिडिया एसोसियसनका अध्यक्ष एवम् भुटानी समाचार पत्रका सम्पादक तेन्जिङ लाम्साङले समेत ओलीको रि–ट्वीटबारे चर्चा गरेका छन् ।
