पहिरोले थुनिएको गुर्जाखोला ‘ओभरफ्लो’ भएर बग्न थाल्यो
म्याग्दी , साउन १० ।पहिरोले थुनिएको म्याग्दीको धवलागिरि गाउँपालिका–१ स्थित गुर्जाखोला तलाउ भरिएर प्राकृतिकरूपमा बग्न थालेको छ।
गुर्जाको खास्टा भन्ने ठाउँमा शनिबार दिउँसो पहाड भत्किएर पहिरो खसेको थियो। पहिरोले थुनिएको खोला रातिदेखि ‘ओभरफ्लो’ भएर बग्न थालेको गुर्जाका वडाध्यक्ष झकबहादुर छन्त्यालले जानकारी दिए।
‘तलाउ भरिएर माथिबाट पानी बग्न थालेको छ’, उनले भने, ‘थप जोखिमको अवस्था अध्ययनका लागि आज बिहानै पहिरो गएको ठाउँतर्फ हामी हिँडेका छौं।’ तलाउ एकैपटक फुटेर बगेको अवस्थामा तटीय क्षेत्रमा बाढी आउने र कटान गर्ने जोखिम हुने भएकाले सतर्कता अपनाइएको स्थानीय प्रशासनले जनाएको छ।
गुर्जा हिमालको फेदीमा मुहान भएको गुर्जाखोला म्याग्दी नदीको सहायक खोला हो। धवलागिरि–४ मुदीमा पुगेपछि गुर्जाखोला म्याग्दी नदीमा मिसिन्छ। सदरमुकाम बेनीमा आएर म्याग्दी खोला कालीगण्डकीमा मिसिन्छ।
पहिरो खसेर खोला थुनिएको ठाउँमा पुग्न गुर्जाबाट दुई घण्टा पैदल हिँड्नुपर्छ। दुवै किनारमा भिर भएकाले साँघुरो खोँचमा पहिरो खसेर खोला थुनिएको स्थानीयबासीले बताएका छन्। खेतमा काम गर्न गएका किसानले पहिरो खसेर खोला थुनिएको देखेपछि स्थानीय जनप्रतिनिधिलाई खबर गरेका थिए।
पहिरो गएको र तलाउ बनेको ठाउँसम्म पुग्ने बाटो छैन। किसानले टाढैबाट देखेर खबर गरेका हुन्। पहिरोले थुनिएको ठाउँभन्दा तल केही समय खोला सुकेको स्थानीयले बताएका छन्।
धवलागिरि, मालिका, मङ्गला गाउँपालिका र बेनी नगरपालिका भएर म्याग्दी नदी बग्छ । खोला थुनिएको खबर आएपछि चारवटै स्थानीय तहको तटीय क्षेत्रका बस्तीमा सतर्कता अपनाउन आग्रह गरिएको म्याग्दीका प्रहरी नायब उपरीक्षक श्यामकुमार राईले जानकारी दिए। रासस
