डेढ महिनादेखि बेपत्ता मञ्जुको आफन्तैबाट हत्या, जेठी सौतासहित चार जना पक्राउ
धनगढी । कैलालीको लम्कीचुहा नगरपालिकामा एक महिलाको हत्या गरेको अभियोगमा प्रहरीले चार जनालाई पक्राउ गरेको छ ।
जिल्लाको लम्कीचुहा नगरपालिका–४ भल्काबस्ने मञ्जु रावलको हत्या गरेको आरोपमा स्थानीय ४० वर्षीया गोमा रावल, वर्षा रावल, २४ वर्षीय भरत रावल र अछामको पञ्चदेवल विनायक नगरपालिका–६ तोली बस्ने ३७ वर्षीया सरिता रावललाई पक्राउ गरिएको जिल्ला प्रहरी कार्यालय कैलालीका प्रवक्ता प्रहरी नायब उपरीक्षक कुलदिप चन्दले जानकारी दिए ।
मञ्जुको हत्यामा संलग्न गोमा जेठी सौता हुन् । उनीहरुका श्रीमान जनकबहादुर रावलको २०७७ साल फागुन ४ मा मृत्यु भएको थियो । वर्षा जेठी श्रीमतीतर्फकी छोरी हुन् भने भरत भतिजा हुन् । उनीहरूबीच जग्गासम्बन्धी अंश विवाद रहेका कारण योजनाबद्ध रुपमा हत्या भएको खुलेको प्रहरीले जनाएको छ ।
मृतक रावलका छोरा विवेकले गत जेठ २५ गते वकिललाई भेट्न गौरीगंगा नगरपालिकाको मसुरीया जान्छु भनी हिँडेकी आमा घर नफर्किएको र मोबाइलसमेत बन्द रहेको हुँदा खोज तलास गरी पाँऊ भनी असार १ गते प्रहरीमा निवेदन दिएका थिए ।
अनुसन्धानका क्रममा प्रहरीले मञ्जु रावलको हत्या भएको निष्कर्षसहित चार जनालाई पक्राउ गरेको थियो । हत्या भएको एक महिना पछि असार २५ गते गोमा पक्राउ परेकी थिइन् । यस्तै साउन ४ गते धनगढी बजारबाट वर्षा र भरत पक्राउ परेका थिए । हत्या घटनामा सहयोगी भूमिका खेलेकी सरिता साउन १२ गते पक्राउ परेकी थिइन् ।
साउन १४ गते प्रतिवादी सरिता रावलले मन्जुको हत्या गरेर शव मोहन्याल गाउँपालिका–५ को बाँसघारी सामुदायिक वनको सेतीखोर खोला नजिकै खोल्सामा ढुङ्गामुनि च्यापेर राखेको बयान दिएकी थिइन् । सोही आधारमा प्रहरीले उनलाई घटनास्थल लगेको थियो ।
उनले भनेकै स्थानमा शव टुक्राटुक्रा भएको अवस्थामा फेला परेको र गुलाबी रंगको कुर्ता सुरुवालले मृतकको पहिचान भएको प्रहरीले जनाएको छ।
