धनकुटाको मूलघाट पुगि फर्केका रोहितलाई गोली प्रहार गरि हत्या गर्ने थप दुई जना पक्राउ
विराटनगर । धरानको सेउती पुलनजिक विराटनगर ५ का रोहित चौधरीमाथि लुटपाट तथा गोलि हानी हत्या गर्ने घटनामा संलग्न थप दुई जनालाई पक्राउ परेका छन् । बिहीबार प्रहरीले धरान र विराटनगरबाट उनीहरूलाई पक्राउ गरिएको हो।
कोशी प्रदेश प्रहरी नायव महानिरीक्षक (डिआईजी) राजेशनाथ बास्तोलाका अनुसार पक्राउ पर्ने धरानका प्रकाश लिम्बू र विराटनगरका अज्जु भनिने अजय शर्मा छन् । शर्माले हतियार उपलब्ध गराएको प्रहरीको प्रारम्भिक अनुसन्धानमा खुलेको छ ।
चौधरी हत्याकाण्डमा प्रहरीले बुधबार नाइके मानिएको लेटाङ नगरपालिका–१ का दीपक तिमल्सिना र धरान–१४ का अनसन तामाङलाई पक्राउ गरी सार्वजनिक गरेको थियो।
त्यससँगै थप अनुसन्धानका क्रममा करिब २२ वर्षका लिम्बूलाई धरान र करिब ३० वर्षका शर्मालाई विराटनगरबाट पक्राउ गरिएको हो । उनका अनुसार घटनामा तिमल्सिनालगायतको समुहलाई शर्माले हतियार उपलब्ध गराएका हुन्।
