पाँचजना छात्रामाथि यौन दुर्व्यवहार गर्ने शिक्षक धरौटीमा छुटे
विराटनगर । मोरङको जहदा गाउँपालिकास्थित एक विद्यालयका पाँचजना छात्रालाई यौन दुर्व्यवहार गर्ने शिक्षक धरौटीमा छुटेका छन् ।
जहदास्थित जनप्रिय आधारभूत विद्यालयका शिक्षक विकासकुमार साहविरुद्ध पाँचजना छात्राले उजुरी दिएका थिए । जिल्ला अदालत मोरङका न्यायाधीश राजेश्वर अर्यालको इजालासले साहलाई एक लाख रुपैयाँ धरौटीमा छाड्न आदेश दिएको हो ।
साहविरुद्ध बाल यौन दुर्व्यवहारसम्बन्धी छुट्टछुट्टै अभियोग दर्ता भएको थियो । थुनछेकपछि न्यायाधीश अर्यालको इजलासले पाँचवटा मुद्दामा जनही २० हजार रुपैयाँको दरले धरौटीमा छोड्न आदेश भएको अदालतका सूचना अधिकारी हेमराज बुढाथोकीले जानकारी दिए ।
अदालतले तोकेको धरौटी बुझाएर साह रिहा भएका छन् । साहले पछिल्लोपटक जेठ ३२ मा एक छात्रालाई यौन दुर्व्यवहार गरेको उजुरी जिल्ला प्रहरी कार्यालय मोरङमा परेको थियो । उनी असार ११ गते पक्राउ परेका थिए ।
विज्ञान विषयका करारका शिक्षक साहले कक्षा चारदेखि आठसम्म अध्यापन गराउँदै आएका थिए । उनले अलग अलग समयमा विद्यालयका पाँचजना छात्रालाई यौनजन्य दुर्व्यवहार गरेको भन्दै मुद्दा परेको थियो ।
दोस्रोपटक दुर्व्यवहार गरेको घटना बाहिरिएपछि उनीविरुद्ध पीडित छात्राका अभिभावकले प्रहरीमा उजुरी दिएका थिए । उनले होमवर्क नमिलेको भन्दै छात्राको सर्टभित्र हात लैजाने, नितम्ब सुम्सुम्याउने, चिमोट्ने जस्ता यौनजन्य दुर्व्यवहार गर्दै आएको उजुरी दिइएको थियो । घटनाबारे छात्राहरुले अभिभावकलाई बताएपछि घटना बाहिरिएको थियो ।
