लगातारको वर्षाले झापामा डुबान, पहिरोबाट पनि क्षति
बिर्तामोड, असार ४ । लगातारको वर्षाले झापामा डुबानका साथै पहिरोबाट पनि क्षति पुगेको छ । अर्जुनधारामा पहिरोका कारण एक परिवार विस्थापित भएको छ ।
अर्जुनधारा-२ को लाप्चेटारमा पहिरो खस्दा स्थानीय पुष्पा समाल मगरको घरमा क्षति पुगेको जिल्ला प्रहरी कार्यालय झापाले जनाएको छ ।
मगरको परिवारका सदस्यलाई सुरक्षित स्थानमा बस्ने व्यवस्था मिलाइएको छ । पहिरो खस्ने कार्य जारी रहेको नेपाल रेडक्रस सोसाइटी झापा शाखाले जनाएको छ ।
त्यस्तै, अर्जुनधारा-१ मा खानेपानी मुहानमा क्षति पुगेको छ भने अर्जुनधारा २ रातेमा मदन भण्डारी मार्ग उत्तर १० घर डुबानमा परेका छन् ।
लाप्चेटार सहकाले जाने बाटो पूर्ण अवरोध भएको र केही ठाउँमा खेतीयोग्य जमिन गोयाङ र टाङटिङ नदीले कटान सुरु गरेको छ ।
त्यस्तै, अर्जुनधारा ३ मा सुखानी खोलाको कज्वेमा पूर्ण रुपमा क्षति पुगेकाले यातायात आवतजावत बन्द भएको रेडक्रस झापाका सभापति लोकराज ढकालले जानकारी दिए ।
