६ बर्षको प्रेमपछि बिहे भएको थियो,लोक सेवा आयोगको तयारीमा थिइन् अनिसा
इटहरी । घरेलु विषयमा पत्नीको हत्या गर्ने एक जना शिक्षकलाई सुनसरी प्रहरीले पक्राउ गरेको छ।
खोटाङ ऐसेलुखर्क गाउँपालिका–१ की २५ वर्षीया अनिशा भट्टराईको उनकै पति सुमन दाहालले सोमबार साँझ हत्या गरेको आरोप थियो।
अनिशा लोक सेवा आयोगको तयारीका लागि सुनसरीको इटहरी उपमहानगर–१२ मा डेरा बसिरहेकी थिइन्।
उनलाई भेट्न आएका सुमनसित घरेलु विषयमा झगडा परेको थियो। सोही निहुँमा सुमनले अनिशामाथि काठको बटमले टाउकोमा प्रहार गरेका थिए। आक्रमणबाट गम्भीर घाइते अनिशालाई उपचारका लागि विराटनगर ल्याइएको र उपचार क्रममा उनको ज्यान गएको प्रहरी भनाइ छ।
पाँच–छ वर्षको प्रेम सम्बन्धपछि गएको वैशाखमा उनीहरूको बिहे भएको पनि खुलेको छ। हत्या अभियुक्त शिक्षक हुन्।
