मृत्यु भइसकेका व्यक्तिहरूको नाममा सामाजिक सुरक्षा भत्ता निकासी
कैलाली । कैलालीको जनकी गाउँपालिकामा मृत्यु भइसकेका व्यक्तिहरूको नाममा सामाजिक सुरक्षा भत्ता निकासी गरी करिब ७३ लाख रुपैयाँ अनियमितता गरिएको खुलेको छ।
मृतकका नाममा भत्ता वितरण गरिएको तथ्य बाहिरिएपछि अख्तियार दुरुपयोग अनुसन्धान आयोगले सो प्रकरणमा ८ जनाविरुद्ध विशेष अदालतमा भ्रष्टाचार मुद्दा दायर गरेको जनाएको छ।
अख्तियारका अनुसार अनियमिततामा गाउँपालिका–९ का अध्यक्ष खगेन्द्र भण्डारी, वडा सचिव प्रम बहादुर बुढा, कार्यालय सहयोगी सोनम कठरियाल, वडा सदस्य कल्पना खड्का, सुनकोसा साकी, बिजय बहादुर रावल, शेर बहादुर विश्वकर्मा र खरिदार पूर्णबहादुर बिष्ट संलग्न छन्। उनीहरूले मृतक लाभग्राहीका नाममा स्वयंले औँठाछाप लगाएर भत्ता निकासा गरेको प्रमाण फेला परेको अख्तियारले जनाएको छ।
अनुसन्धानपछि अख्तियारले उनीहरूविरुद्ध ७३ लाख ३७ हजार ६२७ रुपैयाँ बिगो मागदाबी गर्दै मुद्दा दायर गरेको हो।
सामाजिक सुरक्षाका नाममा गरिब, वृद्ध र असहायका लागि वितरण गरिने भत्ता योजना दुरुपयोग भएको यस घटनाले फेरि एकपटक स्थानीय तहमा व्यापक भ्रष्टाचारको समस्या उजागर गरेको छ।
