झापाको बिर्तामोडमा झगडाका क्रममा भएको कुटपिटबाट एक जनाको मृत्यु
झापा । झापाको बिर्तामोड नगरपालिका वडा नं. ५ मा झै-झगडाका क्रममा भएको कुटपिटबाट एक जनाको ज्यान गएको छ । कार्तिक ५ गते साँझ ६:३० बजेको समयमा ३० वर्षीय जगन राजबंशी कुटपिटबाट गम्भीर घाइते भएको थियो ।
घाइते राजबंशीलाई उनका आफन्तहरूले तत्काल उपचारका लागि बिर्तामोडस्थित बिएण्डसी अस्पताल पुर्याएका थिए । तर, अस्पतालमा डाक्टरले चेकजाँच गर्दा उनलाई मृत घोषणा गरेको इलाका प्रहरी कार्यालय इलाका प्रहरी कार्यालय अनारमनीले जनाएको छ ।
घटनाको जानकारी पाउने बित्तिकै इलाका प्रहरी कार्यालय अनारमनीबाट अनुसन्धानका लागि प्रहरी टोली खटिगएको छ । मृतकको शव हाल सोही अस्पतालमा राखिएको छ ।
प्रहरीका अनुसार घटनामा संलग्न व्यक्तिको पहिचान भइसकेको र उसको खोजी कार्य तीव्र पारिएको छ । कुटपिटको विषय र विस्तृत विवरणबारे थप अनुसन्धान भइरहेको प्रहरीले जनाएको छ ।
