पाँचथरमा गोली हानेर बाबुले गरे छोराको हत्या
पाँचथर । पाँचथरको मिक्लाजुङ गाउँपालिका–८ दुर्दिम्बामा बुवाले गोली प्रहार गरी छोराको हत्या गरेका छन्।
मिक्लाजुङ–८ दुर्दिम्बा भदौरेका ५२ वर्षीय बखतसिंह सिंघक लिम्बूले आइतबार दिउँसो करिब ३ः२० बजे आफ्नै १७ वर्षीय छोरा सफल सिंघकलाई भरुवा बन्दुकबाट गोली प्रहार गरेका हुन्।
मादक पदार्थ सेवन गरेका बखतसिंहले घर पछाडिको बारीमा करिब १०० मिटर टाढाबाट छोरामाथि गोली चलाएका थिए। दाहिने कुम, कञ्चट र छातीमा गोली लागेर सफलको घटनास्थलमै मृत्यु भएको जिल्ला प्रहरी कार्यालय पाँचथरका प्रहरी नायब उपरीक्षक अनिषकुमार कर्णले जानकारी दिए।
प्रहरीले घटनामा प्रयोग भएको भरुवा बन्दुकसहित बखतसिंहलाई नियन्त्रणमा लिएको छ। मृतक सफलको शव परीक्षणका लागि बीपी कोइराला स्वास्थ्य विज्ञान प्रतिष्ठान, धरान पठाइएको प्रहरीले जनाएको छ।
