झापा दमकका २ जना स्रोत नखुलेको २३ लाखसहित सप्तरीमा पक्राउ
झापा । कदमाहा सडक खण्डमा स्रोत नखुलेको रुपैयाँसहित २ जनालाई प्रहरी पक्राउ गरेको छ ।
गाईघाटतर्फ जाँदै गरेको गाडीलाई आइतबार राति ९ बजेतिर सप्तरीको सुरुङ्गा नगरपालिका–२ मा इलाका प्रहरी कार्यालय भेडियाका प्रमुख प्रहरी निरीक्षक पूर्णकुमार राईको नेतृत्व टोलीले शंका लागी चेक गर्दा स्रोत नखुलेको रुपैयाँसहित २ लाई नियन्त्रणमा लिएको प्रहरीले जनाएको छ ।
कदमाहाबाट गाईघाटतर्फ जाँदै गरेको बागमती प्रदेश ०१–०२८ च ५००८ नम्बरको गाडीलाई चेक गर्ने क्रममा २३ लाख रुपैयाँ, विभिन्न इलेक्ट्रोनिक उपकरणसहित झापा दमकका २ जनालाई प्रहरीले नियन्त्रणमा लिएको थियो ।झापा दमक नगरपालिका–५ का २८ वर्षीय किरण सिटौला र सोही ठाउँका १९ वर्षीय धिरज प्रसाईंलाई नियन्त्रणमा लिएर घटनाको सम्बन्धमा सोधपुछ भइरहेको प्रहरीले जनाएको छ ।
पक्राउ परेका सवार गाडीबाट साइकलमा हावा हाल्ने पम्प १ सस थान, इलेक्ट्रिक रिक्साको मोटर ३ थान, इलेक्ट्रिक साइकलको ब्याट्री ३१ थान, इलेक्ट्रिक स्कुटरको ब्याट्री ३ थान, ब्याट्री चार्जर ७ थान, ब्याट्री टेस्टर १ थान प्रहरीले बरामद गरेको छ ।सप्तरीको इलाका प्रहरी कार्यालय कडरबोनामा राखेर थप अनुसन्धान थालेको प्रहरीले जनाएको छ ।
