भोटेकोशी बाढी : १४५३ जनाको शव फेला, १३३३ वटाको व्यवस्थापन र ४७१८ जना अझै बेपत्ता
काठमाडौं, ८ असोज । रसुवाको भोटेकोशीमा आएको विनाशकारी बाढीका कारण बिहीबार बिहान ५ बजेसम्म १ हजार ४५३ जनाको शव फेला परेको छ।
प्रहरीका अनुसार रसुवामा २३६, नुवाकोटमा २०४, धादिङमा ७२, चितवनमा ३६८, गोरखामा ७९, तनहुँमा ३८, नवलपरासी पूर्वमा २३२ र नवलपरासी पश्चिममा २२२ गरी १ हजार ४५१ जनाको शव फेला परेको हो। यस्तै, काठमाडौंमा उपचारका क्रममा थप २ जनाको मृत्यु भएको छ।
फेला परेका शवहरूको पहिचानका लागि डिएनए नमुना सङ्कलनलगायतका प्रक्रिया पूरा गरी हालसम्म १ हजार ३३३ वटा शव व्यवस्थापन (माटोमुनि सुरक्षित) गरिएको छ। शव पहिचानका लागि मृतकका १ हजार ३२९ र आफन्तका २ हजार ३५ गरी कुल ३ हजार ३६४ वटा डिएनए नमुना सङ्कलन भइसकेको छ। पहिचान हुन नसकेका १ हजार ४२१ वटा शवहरूको विवरण भने नेपाल प्रहरीको आधिकारिक वेबसाइटमा राखिएको छ।
बाढी प्रभावित क्षेत्रमा उद्धार, खोजी, राहत वितरण र शव व्यवस्थापनका लागि ७ हजार ९७५ जना प्रहरी परिचालन गरिएको छ। हालसम्म बेपत्ता रहेका ४ हजार ७१८ जनाको खोजी कार्य निरन्तर जारी छ।
यसैगरी, बाढी प्रभावित क्षेत्रका विभिन्न जिल्लाहरूमा स्थापना गरिएका होल्डिङ सेन्टरहरूमा हाल १ हजार २८० जनालाई राखिएको छ।
