सांसदहरू संसदमा पूरै समय बस्नुपर्ने गरी रास्वपाले ल्यायो नयाँ निर्देशिका
काठमाडौं, ८ असोज । सत्तारुढ राष्ट्रिय स्वतन्त्र पार्टीले आफ्ना सांसदहरूका लागि नयाँ नियम लागू गर्ने भएको छ । संसदमा हाजिर गरेर टाप कस्ने सांसदहरुलाई कडाई गर्न रास्वपाले समूह विभाजन गरी न्यूनतम सङ्ख्या उपस्थिति तालिका निर्धारण गरेको छ ।
मुख्य सचेतक कबिन्द्र बुर्लाकोटीका अनुसार अब समूहमा परेका सांसदहरु बैठकको सुरुदेखि अन्त्यसम्म अनिवार्य रूपमा उपस्थित भई छलफलमा सक्रिय सहभागी हुनुपर्नेछ ।
प्रतिनिधिसभामा १८२ सांसद भएको रास्वपाले संसद् बैठकको उपस्थितिलाई थप व्यवस्थित गर्न यो कदम चालेको हो ।
रास्वपा संसदीय दलले तोकिएको मितिमा सम्बन्धित समूहका सांसदलाई बैठकको सुरुदेखि अन्त्यसम्म अनिवार्य रूपमा उपस्थित भई छलफलमा सक्रिय सहभागी हुन निर्देशन नै जारी गरेको छ ।
‘संसद बैठकमा माननीय सांसदज्यूहरूको नियमित र पूर्ण उपस्थिति सधैँ अपेक्षित रहन्छ । तथापि, व्यावहारिक परिस्थितिहरूलाई ध्यानमा राख्दै संसदको छलफललाई थप गुणात्मक, प्रभावकारी र फलदायी बनाउनका लागि शून्य समयरसमूहका आधारमा बैठकको सुरुदेखि अन्त्यसम्म अनिवार्य रूपमा उपस्थित भई छलफलमा सक्रिय सहभागी हुन निर्देशन जारी गरिएको छ,’ बुर्लाकोटीले भने ।
प्रमुख सचेतक बुर्लाकोटीले समूहगत उपस्थिति तालिका नै सार्वजनिक गरेका छन् । असोज ८ गते: समूह ३, समूह ४ र समूह १ (अनिवार्य), असोज १२ गते: समूह १ र समूह २ (अनिवार्य), असोज १३ गते: समूह २ र समूह ३ (अनिवार्य), असोज १४ गते: समूह ३ र समूह ४ (अनिवार्य), असोज १५ गते: समूह ४ र समूह १ (अनिवार्य) र असोज १६ गते: समूह १ र समूह २ (अनिवार्य) गरिएको छ ।
रास्वपा संसदीय दलले अतिरिक्त निर्देशनहरू पनि जारी गरेको छ । रास्वपाले बैठक अवधिभर छलफल प्रभावित नहुने गरी खाजा वा अन्य निरन्तरताका लागि पालैपालो (आलोपालो) समय मिलाउन भनेको छ ।
यसैगरी कुनै पनि प्रस्ताव वा विधेयक निर्णयार्थ सदनमा पेश हुने समयमा अनिवार्य तोकिएका सबै सांसदको उपस्थिति रहनुपर्ने निर्देशन रास्वपाको छ । रास्वपासँग झन्डै दुई तिहाइ सांसद भए पनि विधेयक पास गर्ने बेला कोरमसमेत नपुगेर संसद् बैठक स्थगित हुँदै आएको छ ।
