नवरात्रको तेस्रो दिन, माता चन्द्रघण्टाको विशेष पूजा-आराधना गरिदैँ
काठमाडाैं, २७ असाेज। आज बडा दसैँ अर्थात् नवरात्रको तेस्रो दिन, यस दिन दुर्गा पक्षकी तेस्रो शक्ति माता चन्द्रघण्टाको विशेष पूजा-आराधना गरिन्छ।
धार्मिक तथा पौराणिक ग्रन्थहरूका अनुसार माता दुर्गाले शैलपुत्री र ब्रह्मचारिणीको रूप धारण गरेपछि तेस्रो दिन चन्द्रघण्टाको रूप लिएकी हुन । उनकाे मस्तिष्क मा घण्टाको आकारमा अर्धचन्द्र सुशोभित छ, जसले ब्रह्माण्डको शीतलता, उज्यालो र घण्टाको नादले नकारात्मक ऊर्जालाई नाश गर्ने प्रतीक जनाउँछ। उनको शरीरको वर्ण सुवर्ण (सुन जस्तै चम्किलो) छ र उनका दश हातमा विभिन्न शस्त्रअस्त्र तथा वरमुद्रा लिएर सिंहमा सवार रहेकी हुन्छिन् ।
धार्मिक विश्वास अनुसार, माता चन्द्रघण्टाको रूप अत्यन्तै कल्याणकारी र शान्त भए पनि उहाँका हातका शस्त्रहरूले दुष्ट र असुरी शक्तिहरूलाई परास्त गर्न सधैँ तत्पर रहेको संकेत गर्छन्। माताको यस स्वरूपको उपासना गर्नाले भक्तहरूमा वीरता, निर्भीकता र साहस उत्पन्न हुन्छ। यसले जीवनमा आइपर्ने हरेक प्रकारका भय, संकट र बाधा-अवरोधहरूलाई सामना गर्ने मानसिक शक्ति प्रदान गर्छ। माता चन्द्रघण्टाको मस्तकमा घण्टीको आकार (अर्धचन्द्र) सुशोभित भएको हुनाले उहाँको नाम चन्द्रघण्टा रहन गएको हो। उहाँलाई साहस, शौर्य, शान्ति र दुष्ट शक्तिमाथि विजयकी प्रतीक मानिन्छ।
योग र आध्यात्मिक दृष्टिले नवरात्रको तेस्रो दिनको पूजालाई विशेष मानिन्छ। भनिन्छ कि माता चन्द्रघण्टाको कृपाले साधकको मणिपूर चक्र जागृत हुन्छ। यसले मनलाई एकाग्र बनाउन, मानसिक शान्ति प्राप्त गर्न र आत्मबल उच्च राख्न ठूलो सहयोग पुर्याउँछ।
माता चन्द्रघण्टाले आफ्ना भक्तहरूको सबै दुःख, कष्ट र पापहरू शीघ्र नाश गरिदिनुहुन्छ भन्ने धार्मिक मान्यता छ। उहाँको आराधना गर्नाले घरमा सुख, शान्ति, समृद्धि र आरोग्यको प्राप्ति हुन्छ भन्ने जनविश्वास रहिआएको छ।
आजको दिन भक्तहरूले मातालाई दूध वा दुग्धजन्य परिकारको भोग लगाउने तथा रातो वा पहेंलो रङ्गको वस्त्र धारण गरेर पूजा गर्दा विशेष फल प्राप्त हुने धार्मिक मान्यता छ।
आजको दिन देवीको विधिपूर्वक पूजा, मन्त्र जप, ध्यान तथा प्रार्थना गर्नाले जीवनका भय तथा बाधा-अवरोधहरूबाट मुक्ति मिल्ने, आत्मबल बढ्ने र परिवारमा सुखशान्ति प्राप्त हुने धार्मिक विश्वास रहेको छ।
माता चन्द्रघण्टाको आराधनाले साधकलाई वीरता र निर्भीकता प्रदान गर्नुका साथै मानसिक शान्ति र सकारात्मक ऊर्जा प्राप्त हुने मानिन्छ।
