प्रहरीमाथि आक्रमण गरी प्रहरीको हतियार लुट्ने पक्राउ
बारा । गत वैशाख ११ गते प्रहरीमाथि आक्रमण गरी प्रहरीको हतियार लुट्ने कलैया उपमहानगरपालिका–१२ धर्मनगरका फुलेना साह गोढलार्ई प्रहरीले पक्राउ गरी आज सार्वजनिक गरेको छ ।
विगन साह र फुलेना साहको नेतृत्वमा रहेका ३०–३५ जना तस्करको समूहले प्रहरीमाथि आक्रमण गरी प्रहरीको शटगन लुटेर लगेका थिए । धर्मनगरस्थित नेपाल इँटा उद्योग छेउमै तस्करीको मालसामान प्रहरीले नियन्त्रणमा लिन खोज्दा तस्कर र प्रहरीबीच दोहोरो भिडन्त भएको जिल्ला प्रहरी कार्यालय बाराका निमित्त प्रहरी प्रमुख भुवनेश्वर साहले जानकारी दिनुभयो ।
तस्करको आक्रमणमा परी जिल्ला प्रहरी कार्यालयका प्रहरी हवल्दार शेख मसरुल, प्रहरी जवान चन्देश्वर सिंह, अर्का प्रहरी जवान जगमोहन राउत घाइते समेत भएको पत्रकार सम्मेलनमा उहाँले जानकारी दिनुभयो ।
त्यसैगरी, आज महागढीमाई–६ बबुआइन नजिकैको सडकबाट भन्सार छली ल्याइएको बीआर ०५ टी ६५१०, बीआर ०५ डी ९०४१, ग ४ प १३०८ र ना ३ प ३९१६ नम्बरका चार थान मोटरसाइकल र त्यसमा लोड गरिएको सूर्तीको आठ बोरा धुलोसहित तीन जनालाई पक्राउ गरिएको उहाँले जानकारी दिनुभयो । पक्राउ पर्नेमा सुवर्ण गाउँपालिका–३ का भुलेन्द्र यादव, रामविश्वास यादव र शेषनाथ साह छन् ।
बाराको महागढीमाई बबुआइन नजिकै पक्राउ परेको भन्सार छली चोरीपैठारी गरी ल्याइएको चार थान मोटरसाइकल र त्यसमा लोड गरिएको सुर्ती सार्वजनीक गर्दै बाराका निमित्त प्रहरी प्रमुख भुवनेश्वर साह । तस्वीर: सृजा थापा, बारा, रासस
लागुऔषध सहित पक्राउ परेका सार्वजनिक : प्रतिबन्धित लागुऔषध सहित पक्राउ परेका अभियुक्तलाई बुधबार सार्वजनिक गर्दै पर्सा प्रहरी । भारत तर्फ लागुऔषध लैजाने क्रममा पक्राउ परेका दुई महिला सहित तीन जना र नेपाल भित्र्याएको अभियोगमा दुई जना युवकलाई नियन्त्रणमा लिएको हो । तस्वीर: विजय कुमार महतो, रासस, पर्सा
