काठमाडौंसहित विभिन्न स्थानमा बिहानैदेखि वर्षा, ठूलो पानी पर्ने सम्भावना
काठमाडौं, भदौ ३१ । यतिबेला (सोमबार बिहान) काठमाडौं उपत्यकासहित पूर्वदेखि पश्चिमसम्मै विभिन्न स्थानमा मेघ गर्जनसहित वर्षा भइरहेको मौसमविद्ले बताएका छन्।
मौसम पूर्वानुमान महाशाखाकी मौसमविद् शान्ति कँडेलका अनुसार अहिले मध्य क्षेत्रका काठमाडौंसहित चितवन तथा आसापासका क्षेत्रमा वर्षा भइरहेको छ भने पूर्वका इलाम, झापा, मोरङलगायत जिल्लामा पनि पानी परिरहेको छ। यस्तै पश्चिमका रूपन्देही, नवलपरासीलगायत जिल्लामा पनि वर्षा भइरहेको उनले जानकारी दिइन्।
‘आज भारी वर्षाको सम्भावना छ,’ मौसमविद् कँडेलले नेपालखबरसँग भनिन्, ‘यो पूर्वदेखि पश्चिमसम्मै जुनसुकै स्थानमा हुन सक्छ।’
उनका अनुसार काठमाडौं उपत्यकामै पनि भारी वर्षाको सम्भावना छ।
मौसमविदका अनुसार २४ घण्टामा ५० मिलिमिटरभन्दा माथि पानी प¥यो भने त्यसलाई भारी वर्षा भनिन्छ।
‘निरन्तर वर्षा भएर २४ घण्टामा ५० मिलिमटिर नाघ्यो भने तथा छोटो अवधिमै ठूलो वर्षा भएर पनि यो मात्रा पूरा भयो भने त्यो भारी वर्षामा गणना गरिन्छ,’ मौसमविद् कँडेलले जानकारी दिँदै भनिन्, ‘आज त्यो सम्भावना छ।’-नेपाल खबरबाट
