‘गठबन्धन धेरै टिक्दैन’:एमाले उपाध्यक्ष पौडेल
काठमाडौं, २० फागुन । नेकपा (एमाले) का उपाध्यक्ष विष्णु पौडेलले वर्तमान सत्ता गठबन्धन धेरै समय नटिक्ने बताएका छन् । आज (आइतबार) जनकपुर विमानस्थलमा सञ्चारकर्मीहरुसँग संक्षिप्त कुराकानी गर्दै उनले यो गठबन्धन कुनै पनि बेला टुट्न सक्ने बताएका हुन् ।
आफैंभित्रको अन्तरविरोधका कारण गठबन्धन टुट्ने उनको दाबी छ । उपाध्यक्ष पौडेलले गठबन्धन धेरै लामो समय नटिक्ने बताइरहँदा पार्टी अध्यक्ष केपी शर्मा ओलीले भने प्रधानमन्त्री पुष्पकमल दाहाल ‘प्रचण्ड’ सँग वान टू वान भेटवार्ता गरेका छन् ।
स्रोतका अनुसार वर्तमान गठबन्धन तोड्ने र एमाले सरकारमा सहभागी हुनेबारेमा लामो समयदेखि छलफल भएर निश्कर्षमा पुगिसकेको छ । एमालेबाट उक्त वार्ता टोलीको नेतृत्व उपाध्यक्ष पौडेलले नै गरेका थिए भने माओवादीबाट उपमहासचिव वर्षमान पुनले नेतृत्व गरेका थिए ।
