ताप्लेजुङको दोभान बजारमा भीषण आगलागी, बाक्लो बस्तीमा फैलिँदै
ताप्लेजुङ । ताप्लेजुङको मेरिङदेन गाउँपालिका–३ स्थित दोभान बजारमा बिहीबार दिउँसो आगलागी भएको छ।
पुरानो बजार क्षेत्रमा दिउँसो करिब साढे १ बजेदेखि आगलागी सुरु भएको हो। बाक्लो बस्ती रहेकाले आगो नियन्त्रणमा लिन कठिन भइरहेको जिल्ला प्रहरी कार्यालय ताप्लेजुङका डीएसपी कमल बजगाईंले जानकारी दिएका छन्।
आगलागी नियन्त्रणका लागि नेपाली सेना, नेपाल प्रहरी र सशस्त्र प्रहरीका सुरक्षाकर्मी परिचालन गरिएको छ। घटनास्थलमा दुई वटा दमकल समेत पुगेका छन्।
आगो नियन्त्रणमा लिन जिल्लाबाट थप प्रहरी परिचालन गरिएको प्रहरीले जनाएको छ। आगलागीको कारण भने खुल्न सकेको छैन।
हालसम्म आगलागीबाट भएको मानवीय तथा भौतिक क्षतिको विवरण प्राप्त भएको छैन। प्रहरी तथा सुरक्षाकर्मी आगो नियन्त्रणमा लिने प्रयासमा जुटिरहेका छन्।
