श्रीमतीको रहस्यमय मृत्यु, थुनामा रहेका श्रीमानद्वारा प्रहरीको निगरानीमा दाहसंस्कार
पर्वत, १ असार । जबरजस्ती करणीको आरोपमा पर्वत कारागारमा बन्दी जीवन बिताइरहेका खेमबहादुर दमैकी श्रीमती मिठु दर्जीको रहस्यमय ज्यान गएको छ । पर्वतको जलजला गाउँपालिका–३ बस्दै आउनुभएकी दर्जी मृत अवस्थामा भेटिएकी हुन् ।
बुधबार बेलुका खाना खाएर सुत्नुभएकी दर्जी बिहीबार बिहान ८ बजे आफ्नै कोठामा मृत अवस्थामा भेटिएकी हुन् । दर्जीको ज्यान गएको खबर पाएपछि घटनास्थलमा पुग्नुभएका जिल्ला प्रहरी कार्यालय पर्वतका प्रहरी निरीक्षक लिलाराज लामिछाने नेतृत्वको टोलीले मृतक दर्जीको शव पोष्टमार्टमका लागि जिल्ला अस्पताल बेनीमा पठाएको छ ।
मृतक दर्जीका श्रीमान झारफुक गर्ने बहानामा बालिकामाथि दुव्र्यबहार गरेको आरोपमा गत वैशाख १४ गतेदेखि पुर्पक्षका लागि थुनामा छन् । आरोपित दमैले मृतक श्रीमती दर्जीको दाहसंस्कारमा जान पाउँ भन्ने आशयको निवेदन पेश गरेपछि पर्वत जिल्ला कारागारले प्रहरीको रोहबरमा उनलाई त्यहाँ पठाएको जिल्ला कारागारका जेलर प्रकाश पौडेलले जानकारी दिनुभयो ।
घटना के कारणले घटेको हो भन्ने विषयमा अनुसन्धान भइरहेको जिल्ला प्रहरी कार्यालय पर्वतले जनाएको छ ।
