भारतीय प्रहरीको हिरासतमा रहेका देव नारायणलाई छुटाउन गृहमन्त्री जनार्दन शर्माले चाले यस्तो कदम
काठमाडौं । भारतीय प्रहरीको हिरासतमा रहेका सप्तरी तिलाठीका देव नारायण यादवलालाई कुटनीतिक पहल गरी रिहा गर्न गृहमन्त्री जनार्दन शर्माले पहल गरेका छन् । शर्माले सप्तरीका प्रमुख जिल्ला अधिकारीलाई यादव र उनका छोराको कुटनीतिक माध्यमबाट रिहाइ गर्न निर्देशन समेत दिएका छन् ।
गृहमन्त्री शर्माका प्रेस संयोजक लक्ष्मि पुनका अनुसार उनले आज मध्यान्न प्रमुख जिल्ला अधिकारीलाई टेलिफोन गरेका हुन् । सप्तरी तिलाठी कोइलाडी गाउँपालिकाका देव नारायण र उनका छोरा अजय यादवलाई भारतीय प्रहरीले पक्राउ गरी अपहरण मुद्दा लगाएको छ ।
भारतको सुनौली गएका अजयलाई प्रहरीले पक्राउ गरेको हो । त्यस्तै छुटाउनका लागि पुगेका देवनारायणलाई पनि प्रहरीले पक्राउ गरेको जनाइएको छ । उनीहरुलाई सुपौर जिल्लाको विरपुर थानामा राखिएको छ । गत वर्ष नेपाली भूमिमा भारतीय पक्षले बाँध राख्न खोजेपछि भएको आन्दोलनमा देव नारायण घाइते भएका थिए ।
