धान कटानपछि आफ्नै खेत जोत्न दिएनन् भारतीय सुरक्षाकर्मीले
कञ्चनपुर । भारतसँग सीमा जोडिएको महाकाली नगरपालिका–८, सुन्दरनगरमा भारतीय सीमा सुरक्षा बल (एसएसबी) ले खेत जोत्नमा रोक लगाएको छ ।
नगरपालिकाको सुन्दरनगरमा नेपाल–भारत सीमा स्तम्भ नम्बर १६ को ७९६÷१ सवपिल्लर नजिक रहेको जग्गामा वीरबल गुरुङले भोगचलन गर्दै आएको जग्गामा भारतीय सुरक्षा बलले खनजोत गर्नमा रोक लगाएका हुन् ।
धान कटानपछि खेत जोत्न थालेपछि भारतीय सीमा सुरक्षा बल एसएसबीले रोक लगाएको गुरुङले बताउनुभयो । भारतीय सीमा सुरक्षा बलले खेत जोत्न रोक लगाएपछि खेत जोेत्न छाडेको गुरुङले बताउनुभयो ।
उहाँका अनुसार सोमबार एसएसबीका जवान खेत जोत्न लागेको समयमा आएर भारतीय भूमि भएको भन्दै खेत जोत्नमा रोक लगाएका थिए । समयसमयमा भारतीय पक्षले उहाँले खेती लगाउने समयमा रोक लगाउँदै आएकोमा उहाँ चिन्तित हुनुहुन्छ । धान रोप्ने बेलामा पनि केही समय स्थानीय र भारतीय सुरक्षाकर्मीबीच विवाद सिर्जना भएको थियो ।
धान रोप्न रोकेको विषयमा स्थानीय प्रतिकारमा उत्रेका थिए । विक्रम संवत २०२३ देखि त्यो जग्गा गुरुङले भोगचलन गर्दै आएका हुन् । खेती लगाउने समयमा भारतीय पक्षबाट खेतमै आएर खेती नगर्न भन्न थालेपछि उनी चिन्तामा परेका छन् । रासस
