कांग्रेसका बौद्धिक नेता प्रदीप गिरीले गरे ओलीको खुलेरै प्रशंसा, भने,- उहाँ अबको नेपालमा श्री ३ जतिकै शक्तिशाली नेता त हुँदै हो…
काठमाडौं, ८ मंसिर । कांग्रेसका बौद्धिक नेता प्रदीप गिरीले एमाले अध्यक्ष केपी शर्मा ओलीमा कांग्रेसका संस्थापक नेताद्वय गणेशमान सिंह र कृष्णप्रसाद भट्टराईको धेरै गुण पाएको बताएका छन् ।
कांग्रेस संस्थापक नेता भट्टराईको ९४ औं जन्मजयन्तीको अवसरमा नेता गिरीले कांग्रेसको सपना अव ओलीले पूरा गर्ने धारणा अघि सारेका छन् ।
शनिवार ललितपुरको बाँडेगाउँस्थित भट्टराई आश्रममा आयोजित समारोहमा गिरीले ओलीलाई गणेशमान र किसुनजीसँग तुलना गरेका थिए । ‘यो किसुनजीका सादगी गुणहरुको सम्झना गर्ने कार्यक्रम हो, तथापि म आजको समयका सर्वाधिक शक्तिशाली नेता एमालेका अध्यक्ष केपी शर्मा ओलीतिर हेरेर मेरा कुरा सुरु गर्छु’ गिरीले भने, ‘उहाँ अबको नेपालमा श्री ३ जतिकै शक्तिशाली नेता त हुँदै हो, उहाँसँग म किसुनजी र गणेशमानजीका धेरै गुणहरु देखिरहेको छु ।’
