प्रधानमन्त्री भएकै दिन संसदलाई कडा निर्देशन दिँदै ओलीले भने,- आउने हाजिर लगाएर जाने होइन, बैठकमा भाग लिएर जनताका काममा ध्यान दिनुस्
कुनै पनि कार्यक्रममा दौरा सुरुवाल र साडी चोलो लगाएर उपस्थित हुन सांसदहरुलाई निर्देशन
काठमाडौं, ३ फागुन । नवनियुक्त प्रधानमन्त्री केपी शर्मा ओलीले राष्ट्रपति सहभागी हुने कुनै पनि कार्यक्रममा दौरा सुरुवाल र साडी चोलो लगाएर उपस्थित हुन सांसदहरुलाई निर्देशन दिएका छन् ।
प्रधानमन्त्री नियुक्त भए पछि नेकपा एमालेको संसदिय दलको कार्यालयमा दलको नेता छान्न आयोजित बैठकमा सम्बोधन गर्दै यस्तो निर्देशन दिए । उनले साडी चोलो र दौरा सुरुवालले मर्यादित देखाउने भएकाले पोशाकमा ध्यान दिन आग्रह गरे । “राष्ट्रपति सहभागी हुने कार्यक्रममा सके दौरा सुरुवाल र साडी चोलो लगाउनुस् नसके मर्यादित पोषाक लगाउनुस्, ओलीले भने ।
नवनियुक्त प्रधानमन्त्री ओलीले सम्बोधन गर्दे स्वच्छता कायम राख्नु सरकारको पहिलो प्राथमिकता भएको बताएका छन् । उनले सांसदहरुलाई आचरण लोकतान्त्रिक र पारदर्शी राख्न निर्देशन दिए । “ देशलाई विकास चाहिएको छ, समृद्धि चाहिएको छ उनले भने, हामिले नगरे कसले गर्छ । स्वच्छता कायम गर्नु हाम्रो पहिलो प्राथमिकता हो ।”
उनले भ्रष्टाचार निर्मुल गर्न र जनताको काममा ढिलाई नगर्न समेत सांसदहरुलाई निर्देशन दिएका छन् । “आउने हाजिर लगाएर जाने होइन, ओलीले सांसदहरुलाई निर्देशन दिंदै भने, बैठकमा भाग लिएर जनताका काममा ध्यान दिनुस् ।”
उनले वामगठबन्ध्न महाअभियानमा रहेको बताए । उनले यस विचमा थुप्रै चुनौती रहेको भन्दै त्यसको सामना गर्न आफुहरु तयार रहेको बताए । “चुनौतीहरु आउँछन् त्यसको सामना गर्छौ, उनले भने, हामी अब महाअभियानमा होमिएका छौं ।”
