जनयुद्धमा मान्छे मारिएकोमा बाबुरामले मागे माफी !
गोरखा । नयाँ शक्ति पार्टी नेपालका संयोजक तथा पूर्वप्रधानमन्त्री डा. बाबुराम भट्टराईले माओवादीले गरेको जनयुद्धमा मान्छे मारिएकोमा क्षमा याचना गरेका छन् ।
पूर्वपश्चिम जनजागरण अभियानको क्रममा बुधबार गृह नगर गोरखाको पालुङटार पुगेका डा. भट्टराईले जनयुद्धप्रति गर्व भए पनि मान्छे मारिएकोमा क्षमा याचना गरेका हुन् ।
पालुङटार नगरपालिकाका जनप्रतिनिधि तथा बासिन्दासँगको अन्तरक्रियामा भट्टराईले त्याग र बलिदानबाट नै राजतन्त्र हटेर देश संघीय गणतान्त्रिक बनेको बताए । जनयुद्धका शहीद, बेपत्ता परिवारजन, घाइते सबैप्रति नतमस्तक रहेको बताए ।
राजनीतिमा पनि त्याग र बलिदान नगरी उपलब्धि प्राप्त नहुने उनको भनाई छ । जनयुद्ध लडेको हिजोको क्रान्तिकारी शक्ति भ्रष्टाचारमा डुबेको भन्दै उनले आफूहरू बाँचेर पनि मरेकोजस्तो हुने त होइन भनेर प्रश्न गरे ।
