एमसीसीको अध्ययन गर्न नेकपाले बनाएको कार्यदलद्वारा काम सुरु
काठमाडौं, २० माघ । सत्तारुढ नेकपाले मिलेनियम च्यालेन्ज कर्पोरेशन(एमसीसी) अध्ययन गर्न बनाएको कार्यदलले काम सुरु गरेको छ ।
आइतबार नेकपा केन्द्रीय कमिटीको बैठकमा कार्यदल बनाउने निर्णय भएसँगै कार्यदलले आजबाट छलफल सुरु गरेको हो । सिंहदबारस्थित नेकपा संसदीय दलको कार्यालयमा बसेको बैठकले एमसीसीको सुरुवात र दस्तावेज संकलन गर्ने विषयमा छलफल गरेको छ ।
झलनाथ खनालको संयोजकत्वमा गठित कार्यदलमा एमसीसीको चर्को वि’रोध गर्दै आउनुभएका भीम रावल र परराष्ट्रमन्त्री एवं एमसीसीको पक्षधर प्रदीप ज्ञवाली सदस्यमा छन् ।
कार्यदलले एमसीसीको सम्बन्ध अमेरिकी सैन्य रणनीतिक परियोजना इन्डो प्यासिफिकसँग छ कि छैन ? नेपालको हीतमा छ कि छैन ? लगायतको अध्ययन गरेर केन्द्रीय सचिवालयमा प्रतिवेदन पेश गर्ने जिम्मेवारी पाएको छ ।
सडक र विद्युत परियोजनामा लगानी गर्नका लागि अमेरिकाले ५० अर्बभन्दा बढी सहयोग गर्न लागेको हो । तर, सोही परियोजनाको कतितपय बुँदालाई लिएर पार्टीभित्र विरोध हुन थालेपछि कमिटीले कार्यदल गठन गरेको थियो ।
