चर्को भाडा लिएर यात्रु बोक्ने १६ वटा निजी सवारीसाधन काठमाडौंबाट नियन्त्रण
काठमाडौं, असार २६ । ट्राफिक प्रहरीले काठमाडौंमा चर्को भाडा लिएर यात्रु बोक्ने १६ निजी सवारी साधनलाई नियन्त्रणमा लिएको छ।
महानगरीय ट्राफिक प्रहरी महाशाखाको टोलीले काठमाडौँ उपत्यकामा प्रयोजन विपरीत चर्को भाडा लिएर यात्रु बोक्ने निजी सवारीसाधनलाई नियन्त्रणमा लिएको हो।
महाशाखाका प्रवक्ता, प्रहरी उपरीक्षक वामदेव गौतमले रातो नम्बर प्लेटको सवारीसाधनले प्रयोजन विपरीत भाडा लिएर यात्रु ओसारपसार गरेकाले कारवाही गरिएको जानकारी दिए।
‘बन्दाबन्दीको समयमा सार्वजनिक सवारीसाधन नचलेको मौका छोपेर प्रयोजन विपरीत निजी सवारीसाधन चलाएकाले पक्राउ गरेका हौँ,’ उनले भने।
यातायात व्यवस्था ऐन, २०४९ अनुसार निजी प्रयोजनका लागि दर्ता भएका रातो नम्बर प्लेटका सवारीसाधनले भाडामा यात्रु बोक्न पाउँदैनन्। रासस
