मुख्यमन्त्री राई हेलिकोप्टर चढेर ससुराली होइन, एमालेको कार्यक्रममा जानु भएको हो
विराटनगर- प्रदेश नं १ का मुख्यमन्त्री शेरधन राई हेलिकोप्टर चढेर ससुराली गएको भनेर केही सञ्चारमाध्यममा आएको समाचार गलत भएको नेकपा एमालेका केन्द्रीय सदस्य राजेन्द्र गौतमले बताउनुभएको छ ।
मुख्यमन्त्री राईसँगै मकालु पुग्नुभएका एमाले केन्द्रीय सदस्य गाैतमका अनुसार फागुन १३ गते मकालु गाउँपालिका-२ सेकुवा बजारमा आयोजना भएको कार्यक्रममा सहभागी हुन जानु भएको हो । गौतमका अनुसार विहान गएर सोही दिन साँझ उहाँहरू काठमाडौं फर्कनु भएको हो ।
‘यतिबेला हाम्रो नेतृत्व र हामीलाई अनेक ढंगले हमला गर्ने प्रयास भएका छन्,’ गौतमले भन्नुभयो, ‘त्यसकै एउटा रूप हो यो । मुख्यमन्त्री ससुराली होइन एमालेको कार्यक्रममा जानुभएको हो । मुख्यमन्त्री ज्यूकी धर्मपत्नीसँगै जानुभएकोले गाउँमा खिचेका तस्बिरहरू सामाजिक सञ्जालमा हाल्नुभएको हो । ’
मुख्यमन्त्रीका प्रेस सल्लाहकार ध्रुव सुवेदीले एक विज्ञप्ति जारी गर्दै संखुवासभा जिल्लामा तत्कालिन नेकपाको गाउँ कमिटीले आयोजना गरेको बृहत जनसभा र गाउँपालिकाले आयोजना गरेको कार्यक्रममा पनि सहभागी हुनुभएको थियो । सो हेलिकोप्टरको खर्च राज्यकोषबाट नगरी व्यक्तिगत तबरबाट भएको सुवेदीले जानकारी दिनुभयो ।
